انقطاع العلاقة
هو إنك لما تكون مرتبط بشخص وفجأة تلاقي الشخص جاي يقولك
(أنا ما بقتش عايز أكمل في العلاقة دي)
(لازم ننفصل)
(لازم نسيب بعض)
(مش هينفع نتكلم مرة ثانية)
(لحد هنا علاقتنا انتهت)
ساعتها هنا بتحس إنك مش عارف تعمل إيه، أو تتصرف معاه إزاي.. وبتحس كمان إنك تحت رحمته وإن هو اللي متحكم في الموضوع، بكلمة منه يخليك في حياته، وبكلمة تانية يخرجك بره حياته.. وفي الجزئية دي هقولك على مجموعة خطوات لو نفذتها صح وفهمتها، أوعدك إنه هيبقى، عايز يرجع تاني، ويرجع ندمان كمان.
الخطوة الأولى
عدم السؤال عن السبب
أول خطوة لازم تعملها معاه لما تلاقيه عايز ينفصل عنك وتبقى عايزه يرجع لك تاني
هي إنك ما تسألوش أبداً عن السبب اللي خلاه ينفصل عنك.. يعني بلاش تقوله كلام زي:
(هو أنت ليه عايز تسيبني)
(هو أنا عملت معاك حاجة غلط)..
(هو أنا ما بقتش بعجبك زي الأول)..
(هو أنت ما بقتش بتحبني)..
(ولا فيه حد تاني دخل حياتك)..
(طب قل لي إيه اللي حصل؟)
(أهلك هما السبب؟)
(صحابك؟)
أوعي تسأله أبداً الأسئلة دي
أكبر غلط بيقع فيه أغلب الناس وقت الانفصال هو إنهم بيبقوا عايزين يعرفوا السبب، لأنك لما بتبقى عايز تعرف السبب اللي خلي الشخص اللي معاك يقرر إنه ينفصل عنك، فدا ما بيكونش في مصلحتك أبداً، ليه؟
لأن دا بيخلي الطرف التاني يحس إن أنت لازق فيه، وإنك رافض تنص عنه، ودا هيخليه يحس بثقة أكتر وهيحس إنك متمسك بيه وهيقول بينه وبين نفسه.
(طالما هو متمسك بيا قوي كده يبقى أنا كتير عليه)
دا اللي هيحصل بالحرف إنه يستكتر نفسه عليك.. وكلما حاولت تعرف السبب اللي خلاه يبعد عنك وكلما فضلت تسأله هتلاقيه بيزيد فيها، هتلاقيه بيقولك كلام من نوعية.
(ما فيش داعي نتكلم)
(إحنا فعلا لازم نبعد عن بعض)
وهتلاقيه حتى مش عايز يتكلم معاك في السبب.
لكن أنت هنا طبعا مصدوم لأنك مش فاهم إيه اللي بيحصل، وهتلاقي إن رغ بتك في إنك تتمسك بالشخص داخ مخلياك مصر على إنك تعرف السبب اللي خلاه ينفصل عنك، ودي أول حاجة مش عايزك تعملها أبداً.
فلما تلاقيه عايز يبعد عنك، ويقولك مش هينفع نكمل مع بعض.. كل اللي عليك إنك ترد عليه ب
(أوك طالما هو دا اللي هيريحك، طالما هو دا اللي انت عايزه.. فأوك زي مانت شايف)
وبعدها أوعي تتصل بيه أو تبعت له أي رسائل أو حتى تقابله ولو كان بيجمعكم مكان واحد، زي مثلا إنك معاك في الشغل أو في الدراسة، فبلاش تظهر قدامه كتير.
التعليقات
للتعليق يجب عليك تسجيل الدخول اولا