الخوف من خسارتك
أما الموضوع الرابع فهو إنك لما بتكون في علاقة مع شخص وحاسس إن الشخص مش بيديلك نفس درجة الحب والاهتمام اللي أنت بتديهومله بمعنى إنه مستهتر معاك، ما بيخافش إنه يخسرك، ساعتها كل اللي بتفكر فيه وقتها.. هو إزاي أخلى الشخص دا يخاف إنه يخسرني، إزاي أخلى الشخص دا يديني نفس درجة الحب والاهتمام اللي أنا بديهومله..
في الجزئية دي مش بس هقولك إزاي تخليه يخاف إنه يخسرك؛ هقولك إزاي تخليه يترعب من إنه يخسرك.
امشي معايا خطوة بخطوة.
عدم الإزعاج
أول حاجة لازم تعملها مع الشخص دا هو إنك ما تحاولش أبداً إنك تحبسه في قفص.. أغلب الناس بيعتبروا العلاقة عبارة عن قفص.. متبرمجين على فكرة إن الشخص اللي هرتبط بيه دا لازم أحبسه بمعنى إنه لازم أزعجه باتصالاتي؛ لازم أهتم بيه بزيادة، لازم أعرف عنه كل حاجة، لازم يعرفني كل حاجة بيعملها، لازم الزق فيه طول الوقت علشان يحس إنه مرتبط بيا.
لما تعمل معاه كل دا فأنت هنا تلقائيا بتخليه يحس إنه اتحبس في قفص.. ولما تحبسه في قفص هيحصل إيه.. هتلاقي نفسك تلقائيا قاعد جانبه، بتراقبه، هتلاقي نفسك دايما حواليه، وأي إنسان في الدنيا تحبسه في قفص، هيبقى عنده رغبة كبيرة جداً إنه يخرج من القفص ده.. بمعنى إنك هتلاقيه بيحاول يبعد عنك، يطنش اتصالاتك، بطنش كلامك، ما يهتمش بيك، يعاند معاك.. ليه؟
(لأنك حاولت تحبسه)
اللي أنا عايزك تعمله هنا هو إنك ما تحاولش تحبس الشخص دا في قفص، خليه يطير، بين له إنك مش حابسه، طب إزاي تبين له إنك مش حابسه؟
بلاش تسأله أسئلة كتير، بلاش تراقبه أو تمشي ورا خطواته وتحركاته وهكذا.
لما تسيب له الحرية إنه يبعد.. اللي هيحصل هنا إنك مش هتكون جانبه، فتلقائيا لأنه مش محبوس في قفص، هتلاقيه بيحاول هو إنه يحبسك في قفص.
وهنا هتلاقي هو اللي بقا يزعجك باتصالاته، بيبعت لك رسايل طول الوقت، بيحاول إنه يعرف عنك كل حاجة، بيحاول إنه يقرب منك، بيحاول إنه يجذبك ليه.. لأنه واحد منكم لازم يفضل جنب التاني، فلما ما تحاولش أنت تخليه جانبك، هيحاول هو إنه يخليك جنبه.
لأنه لو ما نفذتش القاعدة دي أتأكد إنك هتكون دايما الطرف المهمل، الطرف اللي دايما بيعاني من مشاكل، والطرف التاني هيفضل مرتاح وأنت عمال تجري وراه.
عدم الاعتماد عليه
تاني حاجة لازم تعملها
علشان تخليه يخاف إنه يخسرك، لازم تلبت له حاجة مهمة جدا، لازم تثبت له إنك مش معتمد عليه أبداً.
بمعنى إنك بلاش تقول له جمل زي:
أنت أهم حاجة في حياتي
أنت كل حاجة في حياتي
أنا ما ببقاش مبسوط غير وأنا معاك.
طب ليه بلاش تقوله كده؟
لما تلاقي نفسك معتمد على شخص إن الشخص دا يكون مصدر سعادتك، فالشخص دا تلقائيا مش هيخاف أبداً من إنه يخسرك.
ولما ما يخافش إنه يخسرك، فمش هيكون عنده الرغبة إنه يرضيك لأنك كده كده أنت مضمون بالنسباله.. ودا اللي إحنا مش عايزينه.
فدايما في كلامك مع الشخص دا تجنب إنك توصله إنك ما تقدرش تعيش من غيره أو إنك توصله إنه مصدر سعادتك.
لأنك هتلاقي نفسك حزنت واكتأبت جداً لو هو بعد عنك.. لازم تكتفي بمشاعرك لنفسك..
قل له إنك بتحبه عادي، قل له إنك معجب بيه، امدحه، ما فيش أي مشكلة، لكن ما تقولوش إنه هو مصدر سعادتك أو إنك ما تقدرش تعيش من غيره، لأن دا هيأكد له إنك معتمد عليه، وبمجرد إنك اعتمدت عليه، هيسيبك.
التعليقات
للتعليق يجب عليك تسجيل الدخول اولا