الخطوة التانية
طمعه
الخطوة الثانية وهي إنك تطمعه، تخليه يطمع في حاجة.. لازم تعرف إن العلاقات للأسف بيحكمها المصالح، ولما يكون عندك مصلحة في حاجة، فهتلاقي نفسك بتقدم اللي تقدر عليه علشان تاخد مصلحتك.. يعني الشخص اللي مطنشك وبيتجاهلك ده، مصلحتك معاه هو إنه لما بيقرب منك بتكون سعيد جداً وفي أحسن حالاتك.. بمعنى أن أنت هنا عندك مصلحة ما بينفعش نكذب على بعض.. أنت عندك مصلحة معاه والمصلحة دي للأسف عاطفية.. وعلشان كدا أنت بتتنازل.. علشان كدا أنت بتحاول تقدم له وتلاحقه وتتصل بيه وتجري وراه.. فكل اللي عايزه منك هنا إنك ما تقعش ضحية للأسلوب دا وتعكس الموضوع.. يعني خليه هو اللي يبقي عايز منك مصلحة، طب إزاي؟ حاجة بسيطة جدا.. حاول تعرف إيه هي أكتر حاجة محتاجها الشخص ده، إيه اللي بيدور عليه، إيه هي الحاجة اللي ممكن تغريه.. وبعدها حاول توهمه إنك بتمتلك الحاجة اللي هو بيدور عليه وإنك تقدر تديهاله، وهنا هتلاقيه مش بيعمل أي حاجة غير إنه بيجري وراك ويتعلق بيك.
الخطوة الثالثة
قلل كلامك
أما الخطوة التالتة فهي إنك بعد ما تطمعه.. لما تيجي تتكلم معاه خليه هو اللي يكتر في الكلام مش أنت، خلي كلامك معاه قليل على قد ما تقدر.. كل ما كترت كلامك كل ما قلت هيبتك.
هي دي المعادلة اللي عايزك كده تطبعها وتعلقها في أوضتك.. لأن الناس اللي كلامهم كتير، هما الناس اللي بيحاولوا يلفتوا الانتباه ويشرحوا نفسهم لأنهم بيبقوا عايزين يقنعوا اللي قدامهم بنفسهم، قاللي عايزه منك هنا هو إنك تقلل كلامك معاه، يعني بعد ما يتجاهلك أو يضايقك وبيجي يفتح معاك كلام رد عليه رد من كلمتين: (أنت كنت محتاج حاجة؟)
ردك دا هيبينله إنك لاحظت غيابه وما عجبكش أسلوبه، ودا اللي مخلي كلامك قليل جدا ودا هيخليه يحس إنه غلط، هيحس إنه غير مرحب بيه ولازم يعتذر ويحاول يرجعك مرة تانية.. أوعى تبقى من الناس اللي بيكتروا الكلام، الناس اللي بمجرد ما يغيب عنهم شخص أو يتجاهلهم، ويرجع يكلمهم فيرجعوا يتكلموا معاه ويبعتوله كلام كتير جدا يعاتبوه ويقولوا له طلباتهم ويوضحوا له انزعاجهم، أوعى تعمل كده.
الخطوة الرابعة
الغياب
ودا أكتر أسلوب لو نفذته صح هيوصلك للي أنت عايزه وهو الغياب.. لازم تعرف إن الناس المتاحين دايما ما بيلاقوش أي تقدير ولا بيكون ليهم قيمة، ليه؟
لأنهم دايما موجودين.. وكلما كان الشيء اللي قدامك نادر جدا، زادت رغبة الناس في إنهم يقربوا لشيء أو ياخدوه.. فلازم أنت تكون واحد من الناس النادرة، واحد من الناس غير المتاحة دايما.. يعني لما تلاقي الشخص اللي كان بيتجاهلك ده.. بقا عايز يقابلك، أجل الميعاد.. لما تلاقي إنه عايز يتصل بيك، حاول تختفي ومتردش على اتصالاته.. لما تلاقي نفسك بتكلمه لمدة يومين أو تلاتة ورا بعض لازم تختفي في اليوم الرابع.. ودا هيخليه يدور عليك ويستناك بفارغ الصبر.
ولما ترجع هتلاقيه بيديلك كل الاهتمام ومش هيتجاهلك مرة تانية.
أما النقطة اللي بعد كده
هي إنه لما يرجع بقا يتكلم معاك مرة ثانية بعد ما كان بيهملك تستعمل معاه أكتر معلومة سحرية واللي بيستخدمها الناس اللي شخصياتهم قوية واللي بيقدروا يتحكموا في مجري أي حوار أو أي علاقة.. المعلومة دي هي إن أنت قدامك أول 15 ثانية علشان تخليه يعمل الحاجة اللي أنت عايزها.. قدامك 15 علشان تفرض شخصيتك، 15 ثانية علشان تديله درس ما ينسهوش.. قدامك 15 ثانية علشان تخليه يحبك أو يكرهك.. ودا معناه إن أول 15 ثانية من أي احتكاك من أي مقابلة من أي محادثة، هي اللي هتحدد إيه اللي هيحصل بعد كده.
يعني لما يكون في شخص بيتجاهلك ويعاملك بأسلوب مش كويس ويجي يتكلم معاك، أعرف إن أول 15 ثانية من مكالمتك معاه هي اللي هتحدد.. هل هيعتذر لك ويتعلق بيك ويخاف يخسرك ولا هيستمر في إنه يطنشك ويتجاهلك.
يعني لما تقابله أو يكلمك ويلاقيك مش منزعج ويلاقي إن ردة فعلك هادية ويلاقي إنك بتتكلم معاه كأنه محصلش حاجة، فهنا هيتمادى في إنه يتجاهلك ويطنشك.. وكده أنت هتكون بتأكد له إن بيمتلكك بنسبة 100% لكن لو لاقي إن أنت في أول 15 ثانية من احتكاك بيه إنك واخد موقف ومنزعج وبتردد عليه بطريقة مش كويسة.. فهنا هتلاقيه بدأ إنه يحس بمشاعر الخوف.. وهيتأكد إنه الوضع بينك وبينه مش كويس ولازم إنه يصلحه.. فبالتالي لما تقابل الشخص اللي كان بيتجاهلك دا وتبدأ معاه أول 15 ثانية من كلامكم بكلام رومانسي.. وتقول (وحشتني.. كنت مختفي فين؟ ليه متصلتش بيا) لو بدأت كلامك بالجمل دي.. فالجمل دي اللي أخدت أول 15 ثانية من كلامكم هي اللي هتحدد الشخص اللي قدامك هيكلمك إزاي.. وطبعا هيكلمك بطريقة مش هتعجبك لأن أنت كده أكدت له إن كل حاجة تمام وأنت لسا موجود.. رغم تجاهله ليك.. ودي من أهم المعلومات النفسية اللي حييت أوضحهالك.
في الجزئية دي شاركتك أهم المعلومات النفسية في علم النفس العكسي وبصراحة بيني وبينكم أحيانا بفكر إني ما انشرش النوع دا من المعلومات، لأن للأسف ممكن بعض الناس يستخدموها بشكل مش كويس، لكن أنا دايما يفترض حسن النية، علشان كده أنا عامل الكتاب دا بس للناس اللي محتاجين جداً للمعلومات دي علشان يرجعوا كرامتهم أو يقوه شخصيتهم ويحاولوا يصلحوا علاقتهم.. علشان كدا أنا هفترض دايما حسن النية وهفضل أشاركم المعلومات دي لأني عارف إنكم محتاجينها جداً في حياتكم.
التعليقات
للتعليق يجب عليك تسجيل الدخول اولا