الموضوع الثاني
حيل نفسية لكسب التعلق
أما تاني موضوع هنتعمله فهو إنك لما تكون في علاقة مع شخص شايف نفسه ومدى لنفسه قيمة كبيرة جداً زيادة عن اللزوم وعايز الشخص دا يتعلق بيك ويشتاق لك، ساعتها بتلاقي نفسك بتحاول ترضى الشخص دا وتكون جانبه على قد ما تقدر، وهنا بتلاقيه بدأ يتقل عليك أكتر ومبقاش يشتاق لك زى الأول.
في الجزء دا هقولك على مجموعة حيل نفسية في علم النفس العكسي، لو فهمتها وعرفت تطبقها صح أوعدك إن الشخص دا هيرجع يتعلق بيك ويشتاق لك أكتر من الأول.
امشي معايا خطوة بخطوة.
الحيلة النفسية الأولى
أول حيلة نفسية بسيطة جداً تقدر تستخدمها هي إنك تديله السبب اللي يخليه يبعد عنك.
يمكن يبان لك اللي أنا بقوله دا حاجة غريبة جدا، شخص أنت عايزه يتقرب منك تديله سبب علشان يبعد عنك؟!
إيه اللي أنت بتقوله ده؟!
اللي بقولهولك دا هو علم النفس العكسي، بمعنى إنك لو عايز الشخص اللي قدامك يعمل لك حاجة معينة أنت عايزها.. فحاول إن أنت تمنعه إنه يعمل الحاجة المعينة دي، لأن القاعدة اللي أنا وأنت نعرفها وكل الناس تعرفها بسيطة جداً وهي (الممنوع مرغوب).
فلما تمنع شخص معين من إنه يقرب منك أو تديله أسباب تخليه يبعد عنك، فهنا هتلاقيه تلقائيا بدا إنه يعاند ويتقرب منك لأنك هتبقى بالنسباله تحدي مش مجرد شخص سهل زي معظم الناس اللي بيحاولوا يتقربوا له.
البديهي جداً إن أي شخص بيحاول يتقرب منك هتلاقيه بيديلك الأسباب اللي تخليك تقرب منه يعني هتلاقيه بيحاول يبين لك إنه شخص لطيف جداً معاك، بيحاول يبين لك شخصيته الجميلة بيحاول يقدم لك خدمات ومساعدات ويحكي لك قصصه المبهرة وبيحاول يخليك تشوفه قد إيه هو شخص محصلش.. اللي أنا عايزه منك بقا إنك تعمل العكس.
يعني الشخص دا اللي شاغل بالك، اللي آنت عايزه يشتاق لك حاول إن أنت تديله بعض الأسباب اللي تخليه يبعد عنك، طب ازاي؟؟
الموضوع بسيط جداً مثلا أثناء كلامك معاه عن العلاقات والارتباط قل لك إنك مابتفكرش في الكلام دا وإن العلاقات بالنسبالك إزعاج ووجع دماغ وإن الارتباط مش من أولوياتك أصلا، فهمه مثلا إنك عايز تسافر، عندك شغلك، عند أهلك، عندك حاجات مهمة أهم من الارتباط والعلاقات والكلام ده.
حاول إنك قدامه تصغر من حجم العلاقات والارتباط تماما وإن الكلام دا بالنسبالك لا يعنيلك.
وهنا هتلاقي الشخص اللي قدامك بقا مركز جداً معاك، ليه؟
لأنه هيحس هنا إن معندكش أي مصلحة معاه، يعني مثلا لو أنت كراجل اتعرفت على بنت جميلة جدا.. لازم تحط في بالك إن البنت الجميلة جداً دي لو فتحنا حسابها على الانستجرام أو على الواتس آب أيا كان هتلاقي إن في ناس كتير جداً بيحاولوا يعرضوا عليها الجواز، بيحاولوا إن هما يقربوا منها، بيقولولها كلام حلو، لو أنت بقا عملت زيهم بالضبط هتلاقي نفسك بقيت واحد منهم وهتلاقي نفسك هنا في قائمة الاحتياط أو الانتظار زيهم أو تتعرض للتجاهل زيهم.. ولكن لو وضحت إن دا مش هدفك بإنك ما تعرضتش الجواز ماتعرضتش الارتباط، لو كلمتها في الموضوع بشكل عام ووضحت لها فكرة إنك ما بتفكرش في الموضوع دا أصلا وإن أنت مهتم بشغلك وحاولت إنك تخلي الموضوع في إطار الصداقة وبس فهنا هتلاقي إنها حطتك في دماغها، ليه؟
لأن هتحس هنا إن معندكش أي نوايا ناحيتها ودي حاجة هتبقى بالنسبالها مريحة جدا وفي نفس الوقت حاجة غامضة ودا هيخليها عندها فضول دايما ناحيتك إنها تعرف السبب اللي مخليك تفكر كده.
نفس الموضوع لو أنت كبنت بتتكلمي مع راجل والراجل دا بالنسبالك جذاب جداً أو ناجح جداً أو غني جداً، فلازم تعرفي غن في بنات كتير بيحاولوا يتقربوا منه، لو عملت معاه نفس الحاجة اللي كل البنات بتعملها معاه وحاولت تقربي منه هتلاقيه بعد عنك زي ما اتعود إنه يبعد عنهم.
فالفكرة كلها هنا إن دايما الشخص اللي أنت عايزه يشتاق لك ويقرب منك إديله أسباب تخليه ما يشتاقلكش زي إنك تتجاهله، تتأخر في الرد، ما تهتمش، ما تسألوش في تفاصيل حياته الشخصية. ما تبينلوش أبداً إنك مندفع بأي شكل من الأشكال وهنا هتلاقي هو اللي بدأ يندفع بكل الأشكال.
التعليقات
للتعليق يجب عليك تسجيل الدخول اولا