سؤال مهم
ما هو علم النفس الأسود، وهل علم النفس يوجد له ألوان؟
الحقيقة أن لعلم النفس فروعا عديدة جداً ما بين فروعه النظرية وفروعه التطبيقية لدرجة أن علم النفس يدخل في كل مجالات حياتنا ما بين علم النفس التجاري، وعلم النفس الصناعي، وعلم النفس التربوي وعلم نفس النمو إلى آخره من الفروع التي لا حصر لها، لدرجة أن علم النفس يدخل في الحروب من خلال فرع يسمى علم النفس الحربي.
أما علم النفس الأسود.. أو ما يسمى بعلم النفس العكسي فهو فرع من فروع علم النفس التطبيقية التي يمكن استخدامه في العلاقات الإنسانية بصفة عامة وفي العلاقات العاطفية بصفة خاصة.
وهو عبارة عن أسلوب يستخدم لإقناع الشخص الذي أمامك للقيام بسلوك ما عن طريق تأكيد العكس تماما ويعتمد هذا المنهج على الظاهرة النفسية التي تدعى المفاعلة، أي كون لدى الفرد ردة فعل محملة بالمشاعر السلبية التي يرفض فيها الاقتناع ولهذا يقوم بعكس ما هو مطلوب وفيما يلى سوف نتعرف أكثر على كيفية الاستفادة من علم النفس العكسي.
الموضوع الأول
التعلق
أول موضوع هنتعلمه هو عبارة عن أذكى 6 طرق في علم النفس العكسي اللي هتخلي أي شخص بتعلق بيك.
الطريقة الأولى
اسمها طريقة الضحية
ودي عبارة عن إن أنت تخلي الشخص اللي معاك يحس إنه هيبقى ضحية ليك، بمعنى أن أنت تفهمه إن قربك منه ممكن يؤذيه، وتفهمه إن مصلحته إنه ما يكونش جانبك.
أغلب الناس للأسف بيلعبوا دور المثاليين، حتى أنت هتلاقي نفسك لما بتيجي تحب شخص معين، أول حاجة بتعملها من غير ما تحس هو إن أنت بتحاول تقنعه إن أنت مناسب ليه.
وطبعا الطريقة دي غالبا بتفشل.. لأن الشخص اللي قدامك غالبا بيكون عارف إن أنت مش شخص جامد قوي كدا زي ما أنت بتحاول توصله + كمان إنه هيحس إن أنت بتتصنع.
لكن لو عملت عكس كده، وبينت للشخص دا إن أنت حد سيئ جداً ولا تليق بيه فده هيخليه يحس:
أولا: إنك شخص مختلف جداً.
ثانياً: إنك صادق جداً.
ثالثاً: ودا الأهم هيقع بقا هنا في مصيدة التحدي وهيحاول إنه يثبت لنفسه ويثبت لك إن وجودك مش شيء مضر ليه ولا حاجة زي ما أنت كنت مفهمه وهيكون حابب كمان إنه يتقرب منك أكتر.
الطريقة الثانية
هي إنك تحاول تبين تناقضاتك
لازم تكون عارف إن أكتر سبب ممكن يخلي شخص يبعد عنك أو يمل منك أو ميحاولش إنه يقربلك، هو فكرة إنه يكون عارفك كويس جداً، يعني لما شخص يقتنع إن أنت لطيف جداً وإن أنت مثالي جداً فهنا هيبدأ إنه يبعد عنك شوية، طب ليه؟؟
لأنه مبيلاقيش فيك المتعة، مبيلاقيش فيك الشغف، ومعندوش الفضول ناحيتك.
لأنه بالفعل عارف كويس وشايف قد إيه أنت شخص مثالي على حسب ما أنت موصل له.
والفضول والشغف والمتعة دي أمور بيحسها ناحيتك الناس لما بيشوفوا فيك الجانب الشرير، وعشان كده لازم تبين تناقضاتك للشخص اللي أنت عايزه يتعلق بيك، يعني زي ما بتبين له الجانب الطيب فيك، لازم تبين له الجانب السيئ فيك، لأنك لما هتبين له الجانب السيء فيك دا هيخليه يحس إنك مبتحاولش تبان له إنك حد كويس علشان يعجب بيك.
ولما الشخص اللي قدامك يحس إن أنت ميهمكش إنه يعجب بيك أو حتى يكرهك فهنا هيبدأ إنه يعجب بيك.
الطريقة الثالثة
هي إن أنت تنتقده وبعد كدا تمدحه
لازم تعرف كويس إن فيه فرق كبير جداً ما بين شخص دايما بيمدحك ولا ينتقدك أبداً طول الوقت، طول الوقت بيوصلك قد إيه أنت كويس، طول الوقت بيوصلك إن كل حاجة فيك حلوة، وإن أنت محصلتش.. الشخص دا بتحس إنه ممل جداً، وفيه فرق ما بين شخص بينتقدك وبعد كدا يمدحك ودا اللي بيكون تأثيره عليك أقوى من الأول، بمعنى إن أنت لما بتيجي تنتقد حد، تنتقد تصرفاته، شكله، كلمة قالها وتيجي بعد كده تمدح حاجة فيه.. دا هيخليه. يحس إنه مبسوط طب ليه؟؟! لأنك هنا هتؤثر فيه بشكل أكبر لسبب واحد بس هو إنه هيحس إن مصداقيتك أنت أقوى بكتير من الشخص اللي كان دايما بيمدحه طول الوقت، يعني هيحس إن رأيك أنت موثوق فيه، لأنك زي ما بتكره فيه حاجات زي ما بتحب فيه حاجات، علشان كده هتلاقيه بيحاول إنه يتقرب منك أكتر علشان يخلي الحاجات اللي أنت كنت بتنتقدها فيه تعجبك وتمدحها، يعني هيحاول يبذل مجهود أكبر علشان يعجبك.
الطريقة الرابعة
إنك تخليه يحس إنه خسرك
يعني لما بيتأكد شخص من إن أنت خلاص بقيت متعلق بيه هنا بيحس إنه فاز، والناس لما بتحس إنها فازت أو انتصرت.. بتريح.
يعني الشخص لما بيحس إنه خلاص أخد الدوري أو فاز بميدالية.. أول حاجة بيعملها بعد الفوز إنه بيقعد ويرتاح ويستجم، نفس الكلام بيحصل لأي شخص بيحس إنه فاز بيك.
وتقدر تجربها بنفسك.. اختار شخص، اهتم جداً بيه، اتصل بيه كتير، خليك معاه في أي حاجة هو بيعملها، وبمجرد إنك خلاص تقتنع إنه فاز بيك.. وقف كل اللي أنت بتعمله، اختف تماما، غير معاملتك معاه، حاول إنك تتهرب منه.
هنا بقا هيحس إنه خسرك وإنه لم يفز بك زي ما هو كان فاكر ودا هيخليه يحس إنه لازم يلاقيك مرة تانية أو يدور عليك، وخليني أقولك إن دي واحدة من أسوأ الطرق في علم النفس اللي بيستخدمها بعض الناس علشان يوقعوك في مصيدتهم.
الطريقة الخامسة
حب ما يكرهه
هي إن أنت تنقى الناس اللي بيكرههم الشخص دا وتتكلم عنهم بشكل كويس أو حتى تنقي أغنية هو بيكرهها وتسمعها وتقوله إن هي حلوة أو تنقي فيلم بيكرهه وتقوله إن الفيلم عجبك جداً. الشخص دا لما هيلاقي إن أنت نوعا ما بتحب الحاجات اللي هو بيكرهها أو بتتعامل معاها بشكل عادي أو بتتكلم عنها بشكل كويس، هنا هيحس إنك مبتغيرش حبك لأي حاجة عشانه بمعنى إن أنت هنا مبتحاولش تبذل مجهود كبير علشان يعجب بيك، يعني لما بتيجي تقول لشخص إن أنت معجب بيه جداً وفي نفس الوقت يلاقيك بتحب الحاجات اللي هو مبيحبهاش وبتبينله دا فهنا هيحس إنك فعلا بتتعامل بطبيعتك يعني مش مصطنع، يعني ما بتحاولش تحب اللي بيحبه ولا تكره اللي بيكرهه علشان يحبك.
يعني هيحس إنك طبيعي جدا
إن دا كمان هيكون سبب قوي غنه يتناقش معاك في كل الكلام دا
إنه كمان هيحس إنك شخص مرن بتتقبل كل الكلام أو معندكش مشكلة مع كل ده، ودا مهم جدا.
الطريقة السادسة
إنك تبعد
أغلب الناس للأسف ميعرفوش معلومة مهمة جدا وهي إن الحب والمشاعر والإعجاب وكل الكلام دا بيحصل في الوقت اللي ميتكنش موجود فيه مع الطرف التاني يعني لما مش بتكون مع الشخص ده.. بتبدأ تفكر فيه، بتبدأ تحس إنه وحشك، وبتبدأ تحلل المواقف اللي مرت بينك وبينه.. يعني خيالك هو اللي بيقوم بالمهمة دي..
خيالك هو اللي بيخلي مشاعر الإعجاب والحب دي تحصل
تعال بقا شوف لو كان الشخص دا لازق فيك طول الوقت فمش هيديلك فرصة أبداً إنك تفكر فيه علشان كده من أهم الطرق هو إنك لازم تبعد شوية علشان تديله مساحة إنه يفكر فيك وأنت غايب.
التعليقات
للتعليق يجب عليك تسجيل الدخول اولا