خيالات سوداء للكاتب أحمد يونس

• الكاتب : q8_failaka
• / 2024-12-03

خيالات سوداء! 

الخبيه التالية بيحكيها (س) صديق نادي الخبايا.. وبيقول في مرة لما كنت حارس امن في قرية سياحية.. حوالي الساعة 2 بالليل طلعت لوحدي اتمشى.. كان وراء القرية على مسافة منطقة ممنوع علينا نقرب منها.. كان العاملين اللي بيشتغلوا قبلي بيحذروني اروح هناك..

بس أنا كنت زهقان وقلت اروح هناك.. مجرد ما دخلت المنطقة دي بدأت أشوف خيالات سودا بتمشي قصادي وأسمع أصوات غريبة.. وابتدى جسمي يتنفش ويترعش جامد.. محطتش في دماغي وكملت

فجأة لقيت كأن كام واحد جايين عليا وبيقربوا مني أوي كل لما أقرب منهم حجمهم يزيد ويكبروا أوي..

بدأت أخاف وقريت قرآن اختفوا..

حاولت ارجع من طريق تاني لقيت مبنى صغير وضوء زي كشاف كده طالع منه، وشوفت اتنين بيضربوا بعض، قلت مين دول.. جريت عليهم علشان أحوشهم عن بعض، وأنا بقرب منهم وهما بيضربوا أكتر في بعض ويقعوا ويقوموا.. قربت منهم أوي.. قلت لهم بس يا ابني أنت وهوا هتموتوا بعض..

ولسه جاي أبعدهم عن بعض أقسم بالله ملاقتش حاجة خالص، وقلت دي باين عليها ليلة سوده ولا ايه..

بدأت أجري علشان ارجع للقرية بتاعتنا.. وقفت شوية كده وبصيت على المبنى ده لقيت نفس الاتنين بيضربوا بعض تاني..

رجعت تاني وقربت منهم.. اختفوا

بدأت أجري..

كل لما أجري أسمع خطوات كتير أوي بتجري ورايا كأنهم كذا حد، وأصوات غريبة ومخيفة.. أقف وأبص ورايا ملاقيش حد.. أجي أكمل جري ألاقي أشخاص جايين عليا شكلهم أسود ومخيف. وأشوف الخيالات السودا بتتحرك يميني وشمالي ومش باين ملامحهم كويس ويادوب ضوء القمر مخليني أعرف أشوف وأجري في الجبل.. وكل شوية جسمي يترعش بطريقة غريبة كأن ماس كهربائي ماسك فيا..

فجأة لقيت حاجة بتشد رجلي وبتوقعني على الأرض.. قمت بسرعة وجريت وانا عمال اقرأ قرآن..

بدأت أحس زي ما يكون حد بيضربني جامد على ضهري.. من شدة الضربة كنت بقع على الأرض لكن كنت بقوم من كتر خوفي وأقوم..

حسيت إني هموت أو هيحصلي حاجة في اليوم ده لحد لما وصلت للسكن بتاعنا في القرية..

واحد من اللي كانوا بيشتغلوا قبلي لما حكيت له قال لي (احمد ربنا انك عايش.. دول هما).

قلت له (هما مين)..

قال: بلاش نجيب سيرتهم، دول بيجوا على السيرة، ادخل اتوضا وصلي ركعتين لله

وفعلا عملت كدا.. ودي كنت آخر مرة أروح المكان ده.