غرفة الرعاية للكاتب أحمد يونس

• الكاتب : q8_failaka
• / 2024-11-01

غرفة الرعاية! 

وإلى خبية لصديق مخلص لنادي الخبايا من داخل الرعاية المركزة

بيقول: أنا شغال ممرض في العناية المركزة..

كونك بتشتغل ممرض في العناية المركزة فده بيخليني اشوف حاجات كتير..

بشوف حالات حرجة وناس بتموت، وناس بيتكتب لها عمر جديد..

في البداية كنت بتأثر باللي بشوفه وساعات كنت بعيط.. لكن بمرور الوقت بدأت اتعود..

بالليل بعد الساعة 2 بتبدأ ساعات نومنا بالتبادل بيني وبين زمايلي اللي معايا.. كل واحد بينام ساعتين لحد الصبح، وبنبدل مع بعض..

لما جه دوري دخلت نمت الساعة 2 بليل على سرير في العنبر..

كان السرير ده مات عليه راجل كبير قبلها بأسبوعين..

نمت ومفيش مشاكل بس وانا نايم حسيت اني مش قادر اخد نفسي..

بقيت مخنوق عاوز انادي على زمايلي.. صوتي مبيطعلش.

كانت عاوز أقوم حسيت اني متكتف في السرير ومش قادر اتحرك.

فجأة ظهر قدامي ضل.. ضل على هيئة راجل قصير.. معرفش فضل قدامي قد ايه.. لكن حسيت زي كهرباء بتخرج منه وبتكهرب جسمي.. وواحدة واحدة حسيت اني هتخنق واموت..

اللي أنقذني ان الساعتين بتوعي خلصوا وزمايلي كانوا داخلين يصحوني عشان واحد غيري ينام.

مبقيتش عارف تفسير اللي حصلي..

تاني يوم بحكي لزمايلي في الشغل لقيت كل واحد قال ان حصل معاه نفس الكلام على نفس السرير ده من غير زيادة او نقص في الكلام..

اتجمعنا كلنا وطلبنا ان السرير يتشال من هنا.. وبالفعل جت الصيانة وخدته.. وبالصدفة عرفنا انهم ودوه مستشفى تانية.. ربنا يكون في عون اللي هينام عليه.