مدبرة المنزل لأحمد يونس

• الكاتب : q8_failaka
• / 2024-09-21

مدبرة المنزل! 

- خبية أخرى ضحيتها من أصدقاء نادي الخبايا بتقول

انها كانت في زيارة لواحدة صاحبتها واتصادف ان كان عندهم عاملة (مدبرة منزل) غير مصرية.. وبعدين لاحظت ان معاها زي كروت كوتشينة لكن عليها رسومات غريبة..

كان عدد الكروت 21 كارت بالظبط وفيهم كارت عليه رسمة زي الجوكر في الكوتشينة..

طلبنا من البنت نلعب بالورق ده، لكنها رفضت وقالت انه بتاعت والدتها وانها محتفظة بيه كذكرى ومينفعش نلعب بيه..

المهم استنينا شوية وبعدين خدنا الورق من وراها من غير ما تعرف..

صاحبتي قالت لي ده شكل ورق السحر..

أنا فضلت أقلب في الورق وبعدين خلطت الورق وسحبت من الوسط ورقة.. طلعتلي ورقة عليها صورة زي صورة الشيطان..

خلطت الورق مرة تانية وسحبت، طلعلي نفس الكارت اللي عليه صورة الشيطان..

وفجأة البنت دخلت علينا فانا اتخضيت ورميت الورق بسرعة..

محطتش الموضوع في دماغي، وخلصت القعدة ورجعت البيت..

كانت الساعة 10 بليل تقريباً وطالعة ع السلم.. اللمبة في الدور اللي انا فيه كانت محروقة بس كان فيه نور ضعيف من الدور اللي تحت والدور اللي فوق يخليني اشوف..

لمحت شيء جاي من ورايا واحد بس كان صغير وكله شعر، وبيجري بسرعة جداً وبيطلع السلم جري لدرجة اني رجعت لورا عشان اسيبله مكان يعدي وفجأة اختفى..

فضلت واقفة في مكاني دقيقة من الرعب وبعدين طلعت على البيت جري..

قعدت في الصالة وادامي اوضة ماما، وفجأة ببص على اوضتها لقيت حاجة شبه الضل واقفة.. قومت جريت خوفت عليها اشوف في أي.. ملقتش حاجة.. بصحي ماما من النوم بقولها انتي كويسه لقيتها اترعبت مني وبتقولي ابعدي عني حد الله بيني وبينك.. بقولها مالك، تقولي امشي، وكانت خايفة مني..

جريت على اوضتي واستخبيت على سريري

تاني يوم بحكي لماما قالت انها مش فاكرة حاجة خالص..

لكن انا متأكدة ان الورق والكارت اللي سحبته هو السبب..

بعدها بدأت اشوف واحدة منقبة واقفة ورا باب الأوضة، وناس قاعدة في نص الأوضة على الأرض وبيتكلموا..

عاوزة اقولكم اني خايفة جدا..

انا رحت لصاحبتي لكن اكتشفت ان البنت اللي كانت شغالة عندهم مشيت وسابتهم..

ارجوكم اتعلموا من اللي حصلي وبلاش تهزروا في حاجة متعرفوهاش.