طبول أفريقيه لأحمد يونس

طبول افريقيه!

الخبية دي بعيدة عن مصر شوية وبيحكيها لينا شاب مصري بيشتغل مهندس اتصالات في دولة افريقية..

الشاب بيقول:

في مرة من المرات عزمني واحد من اللي بيشتغلوا معايا على حفل زفاف لاحد القبائل..

طبعا أنا سمعت كتير عن حفلات زفاف القبائل الافريقية..

رحت مع زميلي اللي هو بالمناسبة من القبيلة دي..

في الحفلة فجأة دخلت واحدة ست ورقصت رقصة غريبة عاملة زي رقص بتوع الزار عندنا..

أول لما الست دي عملت كدا ناس من الموجدين قعدوا يهللوا ويكبروا، وفي ناس جريت من القاعة..

في اتنين ستات عواجيز مسكوا الست وقعدوا يرقصوا الرقصة الغريبة دي معاها..

الست مرة واحدة قعدت تتطوح وترفع دماغها كأنها بتكلم حد احنا مش شايفينه.. وفجأة وقعت على الأرض مغمى عليها..

الستات شالوا الست وخرجوا من القاعة..

لما سألت صاحبي عن اللي حصل قال ان دي اسمها رقصة الجن.. وان دي واحدة ملبوسة من الجن.. وان الجن هو اللي كان بيرقص.. وبعد لما بيخلص رقص بيخرج من الست.

طبعاً أنا مصدقتش الكلام ده.. وطلعت كلمة، أو تقدروا تقولوا اني شتمت الجن..

صاحبي بص لي وقالي بلاش لحسن يؤذوك

ضحكت وقمت شتمت مرة تانية..

فجأة حسيت ان كل حاجة حواليا وقفت، وبعدين الدنيا ضلمت شوية، وحسيت ببرودة في جسمي زي التلج..

حاولت افتح بوقي أو أتكلم.. مقدرتش..

بعدها الدنيا ضلمت تماماً..

لما فقت وفتحت عيني لقيت نفسي على سرير وجنبي صاحبي بيفوقني..

سألته ايه اللي حصل..

متكلمش..

كل اللي عمله ان خرج موبايله ووراني فيديو عليه..

شفت نفسي وانا عمال أرقص رقصة الجن زي ما الست كانت بتعمل..

أنا اتلبست لمدة ربع ساعة وبعدين خرج مني..

مكنتش مصدق.. قلت لصاحبي: هو ممكن يرجع

صاحبي مردش عليا.. بس انا لمحت الإجابة في عينه.. اه.. ممكن يرجع تاني.

التعليقات