_يا ماما الخروف أي دخله اوضتي، منظر القرون رعبني في الضلمة حرام عليكوا.
_خروف اي يا حببتي ما ابوكي دبحه م الصبح؟
لحظة واحدة؟ خروف اي اللي ادبح؟ اومال اللي شوفته في بلكونة اوضتي ده أي ؟
اقدملكم نفسي، أنا هدير.. طول عمري فحالي ومكنش عندي أي مشاكل من اي نوع خصوصًا حوارات الجن والشياطين اللي بسمع عنهم دايمًا من صحابي وبستعجب هما ليه بيحصلهم كل ده؟! وأنا اقصى شئ مرعب حصل معايا لما دوست على ديل قطة والسلم كان ضلمة.
كنت بتعمد أعمل كل الأشياء الخطر بحرية زي إني اسيب باب الحمام مفتوح، أو أخد دش ف وقت متأخر واقف اغني قدام المرايا، واحيانا اقعد اضحك بصوت عالي بدون سبب، كنت مقتنعة جداً أن كل اللي بسمعه ده مجرد خرافات وتهيؤات من صحابي عقلهم الباطن اللي بيرسمه ليهم ومفيش حاجة إسمها عفريت وشيطان ومس وعاشق والكلام ده.
لحد من أسبوع لما بابا دخل البيت علينا وهو معاه خروف كبير صوته مزعج وقرر أنه يربطه في حمام الضيوف لحد ما يدبحه أول يوم العيد.
أول ليلة معرفتش أنام من صوت الخروف العالي في الشقة وقومت بليل على صوته متعصبة ومن عصبيتي اديتله بالقلم!؟ بعدها وقفت استوعب اللي أنا عملته وقعدت أضحك على صدمة الخروف مني وصوت مأمأته اللي وقف فجأة.
لما حكيت لصحابي ف الجروب اللي عملته قعدوا يضحكوا وقالولي صوريه بالله عليكي وانتي بتعملي معاه كده وخدنا الموضوع بهزار ومكننش اعرف اللي هيحصلي منه!...
نفذت اللي صحابي طلبوه وفتحت فيديو ودخلت ضربته بالقلم وقعدت أضحك على نظراته ليا وهو مربوط ومش عارف يطولني.
معرفش ليه لوهلة كده كنت خايفة من نظرات عينه ليا، حسيت أنه فاهم وعايز ينتقم مني، بس مش قادر.
بعدها بيوم حسيت بملل رهيب ومكنش قدامي غيره في البيت وقررت اتسلى عليه وأصاحبه، قعدت اضفر في شعره وأصور لصحابي وأضحك على شكله، وبعدين قررت اني اقص كل الفرو ده زي ما بشوف الحلاقين بيعملوا.
قعدت اقص في شعره بعشوائية وهو بيحاول يستخبى ويهرب مني ويديني ضهره لحد ما لاحظت اني اتغابيت في مرة واتعور وقصيت جلده غلط، صوته بقا عالي جريت جبت بن وكتمت الجرح قبل ما بابا يشوف اللي عملته.
والحقيقة صعب عليا وزعلت من افعالي لما فكرت فيها وقررت مجيش جنبه تاني، لكن هو مسابنيش.
بدأت تحصلي هلاوس وحاجات غريبة اول مرة تحصلي، أول ما حطيت راسي على المخدة بليل وحاولت أنام سمعت صوت جاي من تحت المرتبة بيزوم كده ممممممممممممممممم زي الشياطين.
كان الصوت مرعب وواضح جداً لدرجة تمنعني أشك أن دي مجرد هلاوس من عقلي الباطن.
ويادوب قدرت اغلب خوفي وروحت في النوم لقيت الباب بيتفتح ببطء وبيعمل صوت، قعدت مكاني وفضلت اقول "ماما؟ مين فتح الباب؟" محدش رد عليا وكان الوقت متأخر وكل البيت نايم.
لحد ما ظهرلي قرون طويلة بتدخل من فتحة الباب وراس الخروف بتظهر لكن المرادي عينه كانت حمرا ومنظره بشع.
فضل واقف يبصلي وراسه ثابته قدام الباب، وجري عليا فجأة بسرعة رهيبة موجه قرونه ناحيتي عشان يقتلني، أول ما لمسني صحيت من النوم وأنا بصرخ من الكابوس البشع اللي شوفته.
أعصابي تعبت اليوم ده، ومقدرتش أنام. انتظرت لما طلع الصبح عليا ونزلت خرجت مع صحابي عشان انسى اللي حصلي ورجعت البيت بليل.
أول ما دخلت اوضتي وقفت أغير هدومي ولمحت قرون الخروف ورا الستارة، اتصدمت وطلعت أجري على ماما وأنا بقولها بعصبية من خضتي "يا ماما الخروف أي دخله اوضتي، منظر القرون رعبني في الضلمة حرام عليكوا"
_خروف اي يا حببتي ما ابوكي دبحه م الصبح؟
العروق وقفت في دمي واتجمدت مكاني، إزاي دبحوه؟ أومال مين اللي شوفته ورا الستارة ده؟
فسألتها "هو انتوا جبتوا خروف تاني يعني؟"
لقتها بتقولي "ابوكي حلف ما يجيب خرفان تاني البيت بعد ما لقاه متعور وكان قرب يموت في الحمام"
يعني اللي شوفته في اوضتي ده كان مجرد خيال؟ ولا فعلاً روحه جت عشان تنتقم مني بسبب اللي عملته؟
حاولت طول الليل انام بره ف الصالة عشان خايفة ادخل اوضتي، لكن مقدرتش أنام ع الانتريه واضطريت ادخل الاوضة بعد ما قربت اروح في النوم وجبت أخري م السهر.
فتحت تسجيل التليفون جنبي عشان لو حصل اي أصوات اسمعها، أو يمكن أنا اللي بخرف وانا نايمة وعشان كده بحلم بحاجات وحشة.
"ممممممممممممممممممممممممممممممم" صوت الشيطان رجع من تاني، قومت مفزوعة ولعت النور وأنا بتلفت حواليا وبتأكد اني لوحدي في الاوضة.
لكن اعصابي مش متحملة اني اقدر افوق، قومت افتح الباب وقولت أخرج اعمل كوباية قهوة تفوقني شوية وانام الصبح لما البيت يكون فيه حس اقدر اطمن وانام.
مكنتش مصدقة إني وصلت للدرجة اللي تخليني خايفة من النوم بالشكل ده، أنا اللي طول عمري بسخر من حكاوي صحابي في الرعب بقيت خايفة أنام ومنتظرة البيت يصحى عشان انام؟
وانا بفتح باب الاوضة لقيته مقفول عليا جامد ومبيفتح! فضلت أحاول فيه وانا مش فاهمة دي اول مرة يعمل كده معايا؟
نزلت ابص تحت الباب يمكن في تراب ولا طوبة مانعة أنه يفتح، مجرد ما نزلت على ركبي نور الاوضة اطفى لوحده..!
ورجع الصوت يظهر من تاني لكن المرادي بوضوح "مممممممممممممممممممم" بقيت ادور بأيدي على النور بسرعة وانا بصرخ وبنادي على أهلي، لكن من الواضح إن محدش هيسمعني تاني وهيقدر ينقذني منه زي ما هو ملقاش حد ينقذه مني..!
باب البلكونه اتفتح وبدأت الستارة تطير ويدخل منها رياح رهيبة، لحد ما ظهر هو بهيئة مرعبة.
قرونه كانت بتنزف دم ونازل على وشه كله، وعينه شبه الشياطين بتنور أحمر كأنها هتطلع نار تحرقني، بقا يقرب مني وهو بيعمل نفس الصوت "ممممممممممممممممممممممممممممممم" وبقيت أرجع في الأركان وانا بصرخ وبقوله " انا اسفة والله حرمت والله مكنت اعرف انك بتحس "
قرونه بدأت تطول اكتر قدام عيني وكأنه بيتجهز عشان يقتلني، استخبيت ورا الكومدينو وانا بصرخ وبحاول حد يلحقني منه "يا ماماااااا، يا باااااباااااا ألحقوووووني"
كنت بدعي الموقف اللي فيه دلوقتي يطلع كابوس وينتهي، بقيت احدف عليه اي حاجة تيجي قدامي وانا بحاول افتح الباب واهرب، وبنفس السرعة طلع يجري ناحيتي وغرز قرونه في بطني ومن وقتها محستش بحاجة غير وأنا بشهق كأني كنت غرقانه وماما وبابا جنبي بيحاولوا يهدوني!
سألتهم عن اللي حصل قالولي اني بقالي اكتر من خمس دقايق بصرخ لكن مبفوقش من النوم وهما بيحاولوا يفوقوني.
حمدت ربنا أنه مجرد كابوس، وبعد ما سابوني لوحدي عشان أرتاح والصبح طلع عليا، افتكرت التسجيل اللي كنت فتحاه قبل ما أنام وقولت افتح واسمع اللي حصل، وأول ما شغلته سمعت "ممممممممممممممممممممممممممممممم"
*********تمت***********
گ/شهيره عبد الحميد.
كل سنة وانتوا طيبين، منتظرة رأيكم 🦋🦋🦋
#الثانية_عشر_بتوقيت_شوكي
#شهيره_عبدالحميد
التعليقات
للتعليق يجب عليك تسجيل الدخول اولا