عفريت جوزي

• الكاتب : هاله مراد
• / 2024-05-16

كنت نايمه وقلقت الساعه ٢ بالليل دخلت الحمام .. الشتا بيخليني أدخل الحمام كتير 

انا لسه عروسه جديده وده أول يوم جوزي يروح فيه الشغل ويسبني أبات لوحدي 

وانا في الحمام سمعت صوت خطوات في الدور اللي فوق مني ولان انا ساكنه في الدور الأخير فكان الدور اللي فوق مني هو السطح صوت الخطوات قلقني وخوفت ليكون حرامي ولان جوزي مش موجود معايا فخوفت جدا  

وخرجت من الحمام علشان أتصل بجوزي يقول للبواب يطلع السطح يشوف مين اللي فوق ..كنت ماشيه في الطرقه اللي هتوديني لأوضه نومي والخطوات ماشيه معايا في نفس الأتجاه بالظبط ..وقفت ..فوقفت الخطوات هي كمان كملت مشي كملت معايا..أتوترت جدا..دخلت أوضتي مسكت موبايلي وأتصلت بجوزي ..انا أوضتي فيها بلكونه.. فكرت أني أدخل البلكونه وفعلا دخلت البلكونه والخطوات ماشيه معايا ..حطيت الموبايل علي ودني وبصيت من البلكونه لفوق بأتجاه السطح لقيت واحد واقف فوق ومولع سيجاره  

رجعت لورا بسرعه لما شوفت الراجل ده

قلبي وقع في رجليا ..وضربات قلبي زادت جدا 

 هو مين ده !؟؟ جه من الموبايل صوت الجرس ...كنت بقول في سري رد بسرعه يا أشرف

ولكن في نفس الوقت سمعت صوت رنه موبايل الراجل اللي فوق السطح رجعت بصيت عليه تاني ودققت النظر لقيته أشرف جوزي 

روحي أترد ليا وأتنهدت  

وناديت عليه : يا أشرف ..يا أشرف 

بص عليا

قولتله : أنت أيه اللي طلعك السطح 

حط صباعه علي بوقه بمعني صوتك والجيران 

وشاورلي علي السيجاره بمعني هخلص السيجاره وأنزلك  

أطمنت ودخلت من البلكونه للأوضه بس اول ما دخلت لقيت حد نايم علي السرير كان شبه أشرف بالظبط أتجمدت مكاني وبصوت مرعوب قولتله : أنت مين

فتح عينه وقال : انا هفضل قاعد معاكي لحد ما أشرف يخلص سيجارته 

 

#ميكروفيشكن

#سيد_مصطفي