صصحبه غير امنه!
شاب تاني بيحكي وبيقول
من فترة كنت شغال أنا وصاحبي بنبيض شقة صاحبها القديم كان عازب ومات مخنوق من الغاز للأسف في مصر، وكنا بنبات فيها، صاحبي جه في يوم بالليل بعد لما خلصنا شغل قالي:
- أنا بفكر أنزل البلد يوم وأرجع تاني ايه رأيك ماتيجي معايا
قولتله:
- لأ يا عم انزل انت وأنا هكمل شغل لحد لما تيجي، انت متشوق يعني للبلد بلا هم يا أخي
قال لي: ماشي.
ونمنا تاني يوم صحيت لقيت صاحبي قاعد في الصالة لوحده
قولتله: منزلتش ليه
بصلي كده وسكت شوية
قالي: بعدين بقى
قولتله: طيب ياله علشان نكمل شغل
قالي: تعبان كمل أنت
قولتله: براحتك.
كملت شغل وصاحبي قاعد في مكانه، جيت عليه قولتله:
- أنت تعبان يا ابني
قالي لا كويس مفيش حاجة
قولتله: طب انزل بقى هات أكل علشان بقينا العصر ولسه هتمشي مشوار وهتركب مواصلة واحنا في منطقة شبه مهجورة
قالي: طيب. ونزل جه بعد المغرب بساعة قولتله: أدخل بقى ظبط الأكل خلي عندك دم
قالي: ماشي
لكني حسيت إن صاحبي متغير في حاجة مش فاهمها ايه هي معرفش؟ نظرات عينيه بدأت تخوفني كده، واللي خلاني مستغرب أكتر إنه دخل المطبخ قصاد عيني، ولقيته مفيش ثواني وكان خارج من الأوضة
قولتله: ايه يا ابني شغل العفاريت ده، انت مش لسه داخل المطبخ حالاً، دخلت وخرجت من الأوضة ازاي
ابتسم كده وقالي: متخافش انت خايف.
ونظرات عينه خوفتني أكتر
دخلت البلكونة أتكلم في التليفون بقى أطمن على أهلي
لقيت مكالمة جاية من صاحبي اللي شغال معايا في الشقة
رديت قولتله عايز ايه انت عشان بتعمل الأكل في المطبخ بقى هتشتغلني كل شوية
قالي: أكل ايه ومطبخ ايه يا ابني أنا برن عليك من الصبح علشان أشوفك عاوزني أجيب حاجة معايا من البلد وأنا راجع ولا ايه
خرجت من البلكونة ودخلت المطبخ ملاقتش حد سيبت الشقة ونزلت على طول.. ولغاية دلوقتي مش عارف ايه اللي كان معايا
التعليقات
للتعليق يجب عليك تسجيل الدخول اولا