"آخر إنسان على وجه الأرض"
اليوم 1 يناير 2025
أسمى "كارم محمد أحمد " وأنا أخر إنسان على وجه الأرض ...
الموضوع بدأ فى 2020 لما أنتشر فيرس كورونا فى العالم بعد ماظهر فى الصين , وقفوا المطارات فتره وفرضوا حظر تجوال والزموا الناس اللى هتنزل الشارع يلبسوا كمامات علشان الفيرس ماينتشرش .
بس مكانوش يعرفوا أن كوفيد 19 كان البداية !!!
كل دولة فى العالم قفلت على نفسها فترة ,ومنعوا أى تجمع وكل حاجه وقفت ،الصناعة والتجارة وغيره .
وطبعا الإقتصاد العالمى أنهار...
رجعوا فتحوا تانى بعدها بكام شهر .
فيه ناس قالت فتحوا علشان الإقتصاد, وناس تانية قالوا علشان سيطروا على الوضع والفيرس خلاص بيضعف .
ظهرت فيروسات تانية فى نفس الفترة زى أيبولا والطاعون الدبلى بس ماخدوش الرواج الإعلامى اللى خده كوفيد 19 , أو بمعنى أصح شافوا أنهم لو رجعوا قفلوا الدنيا تانى
هيبقوا بيموتوا العالم من الجوع قبل ما يموت من الفيروسات .
وهنا ياصديقى الوهمى أندلعت الحرب بين البشر والفيروسات , واللى حصدت فيها الفيروسات تقريبا ثلث سكان الأرض وقتها ..
لحد ما جات سنة 2022 وظهر فيرس من نوعية فيروسات كورونا , واللى كان متطور جدا وسريع الإنتشار , المره دى مالحقتش دول العالم تقفل حدودها وأنتشر الفيرس واللى سموه ساعتها فيرس الموت أو الفيرس الأسود .
وصلت نسبة الوفيات ل90 فى الميه !
ومات تقريبا كل البشر ماعدا أنا وحوالى 50 واحد على مستوى العالم !!
كنا أحنا بس اللى فى العالم كله بنعمل تويتات على تويتر وننزل بوستات على الفيس ,كلنا كنا أصدقاء مشتركين لبعض على الفيس وتويتر ةلينا جروب على الفيس بنتلم فيه ونطمن على بعض .
كنا متفقين نبقى على طول أون لاين على السوشيال ميديا , علشان محدش فينا يحس بالوحدة أو يكتئب .
بس للأسف كل يوم كان بينقص مننا واحد ولمبة الاون لاين بتاعته تطفى وتبقى أوف لاين وعمرها مابترجع أون لاين تانى أبدا !!
كل يوم يعدى ، واحد مننا ينقص وتنطفى لمبته!!
لحد مابقيت أنا بس اللى على النت كله ،مفيش حد أون لاين غيرى! فعرفت أنى آخر انسان على وجه الأرض !!
النت مابقاش ليه لازمة والموبايل مابقاش ليه أستخدام !!
وبقيت فى العالم الحقيقى ,والافتراضى لوحدى !!!
حاولت أحمى نفسى من الاكتئاب , قريت كتب كتير لحد مانظرى ضعف .
أتفرجت على النت على كل الأفلام والمسلسلات الى ممكن تتخيلها, لحد مازهقت .
عملت زى فيلم أجنبى و جبت كور وكلمتها علشان ماتجننش من الوحده .
أتخانقت معايا وصالحتنى .
صرخت بأعلى صوت فيا وشتمت كل الناس يمكن حد يشتمنى !!
نزلت من بيتى وجريت فى الشوارع أدور على أى بنى أدم او على أى حيوان حتى !!
الشوارع مليانة جثث لكلاب وقطط وبنى آدمين وبياكل جسمهم الدود !
ماطقتش ريحة الشوارع ورجعت بيتى .
بصيت لنفسى فى المراية
كل شعر جسمى طويل لدرجة ان ملامح وشى مابقتش باينة من كتر الشعر واللى غطى دقنى وشنبى وحواجبى .
حتى خدودى نشفت وعضمت وبقت عباره عن شعر بس !!!
ليه يارب ماموتنيش معاهم !!! ليه سبتنى لوحدى فى العالم!!! ليه عذبتنى العذاب ده كله !!
كنت بسمع على طول صوت باب بيتى وهو بيخبط , وكنت بجرى افتحه زى المجنون.. بس ولا مره لقيت حد واقف بره !!!
كنت بشوف أبويا وأمى فى أحلامى وأسمع صوتهم بينادينى !!!
وحشتونى أوى ... ياريتنى انا اللى موت من الفيرس مش أنتوا !!
كل يوم جرس الباب يرن والباب يخبط جامد ... أفتح مالقيش حد واقف بره !!!
عرفت أنى خلاص وصلت مرحلة الجنون , وقررت أنتحر علشان أخلص من عذابى ..
قومت أتوضيت وصليت , وبعد ماخلصت صلاه وسلمت , فضلت قاعد على المصلية وطلبت من ربنا المغفرة.
مسكت السكينة اللى جنب المصلية بأيدى وهيا بتترعش , كشفت دراعى وقربت حد السكينه منه ,شكيت دراعى بالسكينة فنزل دم ووجعنى الجرح.
بكيت ونمت على بطنى فوق المصلية ودموعى بتنزل منى وانا بقول :
ليه يارب ... ليه بتعذبنى العذاب ده !!!
فجأه رن فى ودانى صوت الرسايل بتاع موبايلى , قومت بسرعه أدور عليه , دوخت على مالقيته ،لقيته فى الاخر فى حله على البوتجاز !!
بس لقيته مقفول ومفهوش شحن .
أمال أنا سمعت صوت أيه؟ !!!!!
قعدت أدور على شاحن الموبايل , لقيته تحت الكنبه !!!
وصلت الموبايل بالشاحن , وقفت ملهوف عايزه يخلص ويفتح !!
الموبايل شاشته نورت , بس مفيش رسالة جات .!!!
كنت هرميه من الشباك , بس أفتكرت أنى قافل النت على الموبايل , فتحت النت بسرعة وأنا ملهوف .
وأتفاجأت برسايل كتيرة أوى بتيجى ورا بعضها , كلها من ناس أعرفهم وأصحابى وماتوا من الفيرس !!!
الرساله كلها كلامها مختلف بس مضمونها واحد :
أنت فين من يومين يابنى أنت !!؟
يخربيت المخدرات اللى بتضربها ..
يامؤنس يابنى مختفى فين !!
انت فين يابن ال.......... هو كل ماتشدلك سطرين تغيب كده ... والله الخره ده هيموتك فى يوم .
قبل ما استغرب لقيت الباب اللى بره بيتكسر وأبويا وأمى بيدخلوا عليا البيت ومعاهم واحد نجار .
أبويا !!!! أول ماشوفته جريت علشان أحضنه ... ضربنى بالقلم وقالى :
يابن الكلب بقالنا 5 ساعات على الباب بنخبط وأنت جوه ومش راضى تفتح ؟!!!
وبص على التربيزه وبصيت معاه لقينا الطبق اللى فيه باقى المخدرات اللى كنت بضربها !!
ابويا نزل فيا ضرب وامى ساعدته بالشبشب .
بعدها ودانى المصحه علشان أتعالج .
كان نفسى أتعالج علشان المخدرات خلتنى مابقتش أميز الحقيقه من التخيلات وكلت مخى وعيشتنى فى وهم كله عذاب !!!!
أياك والمخدرات فهى تدفعك للأنتحار وتجعلك تخسر أعز ماتملك قبل أن تفقده !!!
تمت بحمد الله ..
تم اعادة النشر بناءا على طلب الاعضاء
لو عجبتكم القصة لايك وكومنت وشير واكسب ثواب النصيحة 😀😀
القصة محفوظة بموجب قوانين حفظ حقوق الملكية الفكرية وسرقتها أو نسخها تعتبر جريمه
#قصه_قصيره
#كورونا
#كوفيد_19
#اخر_انسان_على_وجه_الارض
التعليقات
للتعليق يجب عليك تسجيل الدخول اولا