- صديق من نادي الخبايا بيقول
أنا شغال على makinâ CNC رىُتِرة مش عارف حد هيبقى عارفها ولا لاء. هيا بتشتغل في الخشب والزواق على الخشب وكده. وطبعاً أنا دمياطي وانتم عارفين دمياط والموبيليا فعندنا مفتريين شوية على نفسنا في حتة الشغل، وعملنا الشغلانة ورديتين عشان الماكينة تشتغل 24.
جالي واحد في يوم في الشتا والشغل نايم طلب مني اشتغل عنده.. كان عنده 3 ماكينات واحنا كنا 3 افراد
المكان عبارة عن مزرعة فراخ قديمة، وسط أراضي زراعية وورديتنا كانت من 8 مساء إلى 8 صباحاً.
أنا وواحد كان أول يوم لينا شغل والتالت كان شغال بقالوا كام يوم بس. يعتبر احنا ال 3 جداد هنا في الوردية دي. كنا في الشتاء والمزرعة فيها أماكن كتير مفتوحة والجو كان برد جدا علينا.
المهم أول يومين كانوا طبيعين خالص مفيش فيهم أي مشكلة
تالت يوم أنا فاكر كويس كان الجو برد فوق الطبيعي. قررنا نولع نار وندفي نفسنا وكده. احنا كنا متفقين نساعد بعض اللي الماكينة بتاعته تخلص الشغل الاتنين يقوموا معاه يساعدوه كانجاز يعني ونريح بعض.
المهم قمنا احنا التلاتة نريح. النار كانت شغالة ولسه الخشب متحرقش اللي بندفى بيه..
دخلنا تقريبا 10 دقايق جهزنا الشغل وخرجنا كانت النار مطفية.. على الأقل المفروض كان يبقى الجمر لسه والع. دا بقالنا 10 دقايق بس يعني وكان لسه في خشب سليم أصلاً والنار بادئة تمسك فيه. لا احنا لقينا النار رماد صافي ولا دخان ولا أي حاجة.. مفيش في دماغنا حاجة وقتها بس استغربنا شوية، وعدينا الموضوع، وبقية اليوم مفهوش حاجة غريبة
رابع يوم، وانا جاي انا وواحد من الاتنين اللي معايا من وسط الأرض، كان في طريق ترابي كده. سمعنا حد ماشي ورانا. نبص منلاقيش حد. بصينا يمكن 3 أو 4 مرات مفيش حد. احنا خفنا وسرعنا خطوتنا لحد ما وصلنا.
في نفس اليوم واحد خرج يملى ازازة ميه عشان نعمل شاي. جاي يقلنا مين الرخم فيكم اللي كان بيحدف عليا طوب برا. بصيت للتاني وبصلي واستغربنا، وقولنا اننا متحركناش من المكان اللي قاعدين فيه.
وبدأنا فعلا ندرك ان المكان هنا مش مظبوط.
وعدى اليوم الرابع على خير
خامس يوم وآخر يوم لينا احنا التلاتة، كنا قاعدين ومشغلين أغاني اقسم بالله الموبايل اتعلق في الهوا يمكن متر ونص مرفوع عن الأرض. واتأكدنا اننا مش لوحدنا خلاص
مشينا وسيبنا الشغلانة ومدخلنهاش تاني
التعليقات
للتعليق يجب عليك تسجيل الدخول اولا