البركة الدرامية لأحمد يونس

• الكاتب : q8_failaka
• / 2024-02-11

البركة الدرامية 

- وإلى خبية ثانية

بنت مصرية عايشة في قرية.. بتقول عند البعض القليل منا عادات غريبة وملهاش علاقة بالدين مجرد موروثات بشعة، من ضمن العادات دي ان البنت قبل الجواز لازم تروح لراجل بيقولوا عليه (بركة) وله كرامات. وبيقولوا ان أي بنت تروحله لازم يعزمها (بتشديد الزين), أو يكتبلها حاجات عشان تبقى حياتها سعيدة وتخلف بسرعة

بنت عمي كانت على وش جواز وفرحها قرب اخدتها أمها للراجل البركة ده عشان يباركها..

عارفين عمل ايه؟

الراجل البركة اخدها في أوضة وقالها أنا هكتب على ضهرك ورجليكي، البنت رفضت تماماً وقالتله اكتب على ايدي أو رجلي لكن مش هتعرى، قالها لا، وهي رفضت بشدة، قالها خلاص هاكتب على ايدك.. كان واضح انه خاف انها تعمل شوشرة عليه.. كتب على ضوافر ايديها ورجليها شوية حروف غريبة مش لغة عربية..

مرت الأيام واتجوزت البنت وفي ليلة الفرح ولما دخلت شقتها، وأول ما دخل جوزها وراها صرخت ودخلت تجري على أوضة النوم ووشها مرعوب وتقوله: مشي الراجل اللي هنا ده.

جوزها يقولها مفيش حد غيري. تقوله لا فيه حد هنا وشكله وحش جدا

جوزها فتش البيت لكن مفيش حد. وفي الاخر فكر انها ممكن تكون قلقانه أو خايفة فقالها طيب نامي والصباح رباح.

لكن الموضوع ده استمر أسبوع.. كان كل ما جوزها يطلع من الأوضه يظهر لها الراجل الغريب ده وأول لما جوزها يدخل الاوضه كان يختفي..

الموضوع استمر تقريباً أسبوع، بعدها اتطور الموضوع انها بتحلم بنفس الشخص ده، وتقوم مفزوعة من النوم.. جربوا يقروا قرآن تهدى من الهيستيريا اللي بتجيلها وقت تشغيل القرآن بس بعدها بترجع تاني للحالة، لأنها بقت بتشوفه بشكل دائم في أي ركن في البيت..

قالوا ممكن يكون حسد أو حد عمل لها عمل.. قعدو يبخروا ويجيبوا شيوخ من بلاد بعيدة، واستعانوا بالراجل البركة وده اللي بهدلها اكتر، وعاشت في معاناة لمدة سنة من الشيخ ده لده، ومن الدجال ده للدجال ده.. كانت تهدى وتعيش حياة طبيعية فترة صغيرة، وترجع تشوف الاحلام تاني ويتكرر الموضوع تاني..

بمرور الوقت اتطورت حالتها بشكل بشع.. بقت بتزعق كتير بالليل، وتصرخ بكلام مش مفهوم، وصوتها نبرته بتختلف تماما..

جوزها سأل ناس قالوله دي كده تبقى ملبوسة، ده مش عمل.. ورجعوا تاني للشيوخ، بس استخدموا طرق مختلفة في العلاج من ضرب، وحبس، وبهدلة، وعملولها زار

قالوا نجرب نغير المكان اللي هي عايشة فيه.. جت قعدت مع أختها وجوزها وولاد أختها.. كانت كويسة وتضحك معاهم وافتكروها خفت، لحد ما حد من الأولاد شغل القرآن راحت ماسكة الكاسيت وكسرته.. استغربوا جدا من قدرتها على تكسيره لأن الكاسيت تقيل قوي وهي مافيهاش جسم خالص.. اتأكدوا برضو أنها مخفتش. جوز بنت عمي ناس دلته على واحد شيخ بيفهم في الأمور دي، ومبيخدش فلوس خالص..

الشيخ جه عندنا البيت وجبنا بنت عمي وجوزها.. الشيخ خلانا جبنا أزايز مليانة مية وقرأ عليها قرآن، وشربنا منها ورشينا في الأركان، بعدين أخذ زجاجة مليانة شالها، والباقي رماه أدام الباب

أول لما دخلت البنت وشافت الشيخ صرخت فجأة ولقيناها بتقول الشيخ حسن لا، الشيخ حسن لا.

بعد شوية بدأنا نسمع أصوات صريخ، وبقت تقولهم: أنا الحارس، أنا الحارس، امشي بدل ما اقتلك..

الشيخ بدأ يقرأ عليها قرآن وكل لما يقرأ كانت بترتعش وتطلع أسطوات غريبة.. وبدأ يحصل حوار غريب بين الشيخ وبين الجن اللي جواها..

انت مين؟

أنا الحارس.

وجاي ليه؟

جاي أعذبها ومخليهاش تتجوز.

الشيخ: لازم تطلع وتسيبها

الجن: موافق بس على فكرة انسا مش لوحدي احنا 12 جوها

الشيخ: أنا هموتكم كلكم لو مخرجتوش.

وبعدين راح جاب الزجاجة اللي فيها المية المقري عليها وحطها في أطباق صغيرة أدام صوابعها العشرة لرجليها، وقعد يقرأ.

وبالفعل طلع في المية بسيط

خرج منها عشرة

واتبقى اتنين باين قاله هايكملو جلسات تانية عشان يخرجوهم بس دول أضعف ومش هايتعبوها.. البنت رجعت لحياتها تاني وبعد فترة عملولها جلسة واحدة تاني وخرجوا اللي فيها.

وعرفنا ان الراجل البركة اللي راحت له زمان هو اللي عمل لها العمل لأنها رفضت تتكشف قدامه.. وبعد فترة الراجل ده مات.. ناس بتقول انه اتقتل، وناس بتقول انه انتحر.. بس المهم أن شره انتهى للأبد.

ا