الكابوس رقم 1
اللي حصل كان أكبر من تحملي أو تحمل أي بني آدم مكنتش أتوقع عمري إني بعد وفاة أحد أقاربي كبار السن وقبل الدفنة بساعة إني هروح وأنزل قبره..
اللي حصل إننا كنا المغرب والجثمان كان هيصل العشا وكنا واقفين قدام التربة، فلاقيت اتنين من قرايبي من البلد فتحوا باب التربة ونزلوا وبلعتهم الضلمة، وقفت الفضول بياكل فيا وعمال أدقق النظر عشان أشوف أي حاجة لحد ما ظهر من الضلمة وحش فجأة خلاني رجعت بضهري لورا في فزع فلاقيته بيبتسم وبيقولي بقا أحمد يونس اللي مخوف عيالنا كلها بيخاف، مكنش وحش كان واحد من الاتثنين اللي نزلو لكن خروجه المباغت هو اللي ربكني..
تلعثمت ومعرفتش أرد غير يا دوب بابتسامة باهتة فلاقيته بيمدلي ايدو إني أدخل، ترددت قليلاً لكن إيدي كانت قررت ونفذت، حسيت كأني طفل محتاج إيد حد كبير تفضل ضاغطة على إيده.
دخلت جو الضلمه وتحول الوضع كله لحالة من العمى المفاجئ
يونس: عم داود أنا مش شايف حاجة هو محدش خد معاه كشاف حتى؟
داود: انزل بس السلم عمك عبد الفتاح تحت بيحضر الفرشة
يونش: فرشة إيه؟
داود: أومال عاملي فيها بتاع عفاريت وأنت محصلتش حتى بتاع قطط..
نزلنا على السلم اللي بتحسسه برجليا ومع أول درجتين ظهرت إضاءة من تحت متسلطة على الأرض، كان عم عبد الفتاح حاطط كشاف في الأرض ومسلطه على الأرض وكان بيعمل حاجة غريبة أوي!
كان معاه سفة نخلة وبيمشيها برقه شديدة على الأكفان القديمة الموجودة في التربة وبعدها يمشيها على جزء فاضي من الرمل من الواضح أنه متجهز للمرحوم!
يونس: يا نهار أسود هو محدش جهز التربة؟
داود: لا يا أحمد عمك عبد الفتاح بيجهز الفرشة
يونس: فرشة إيه؟
عبد الفتاح وهو يتنفس بصعوبة: المكان ده له صحاب ولازم نستأذنهم إنه جاي لهم ضيف، شايف الجريدة بتاعة النخل دي؟ دي بقا مقري عليها قرآن وبناخدها ونمسح بيها على الميتين اللي هنا
يونس مستنكراً: إيه بترقيهم؟
داود: حاجة زي كده بنمسح عليه ببركة كتاب ربنا وبعدها بنمسح الأرض فبنراضيهم وبنخليهم يحسنوا استقبال الميت
يونس: هو فعلا حكاية ان الميتين بيتسقبلوا الميت الجديد دي يا جماعة؟
عبد الفتاح: طبعاً البرزخ ده حياة كاملة، أقولك على حاجة كمان؟ انت تعرف إنهم بيبقوا عاملين احتفالات ويفضلوا يقولوا لبعض فلان جاي انهاردة.. فلان جاي انهاردة..
يونس: يعني بابا استقبل مصطفى ابن أختي يا عم داود ومكنش خايف حبيبي الله يرحمه؟
داود: أولاً مصطفى ابن أختك ده كان عنده 12 سنة ده ملاك والناس كلها زعلت عليه ومكانته عند ربنا كبيرة أوي وهو اللي هيشفع لكم واحد واحد وهو لعلمك سبقكم عشان يكون في استقبالكم، أول حد منكم هيروح له هيشوفو علطول
يونس: أنا خايف على ماما أوي وحاسس إنها خلاص قربت تروح له
داود: ربنا يبارك في عمرها
عبد الفتاح: الموت علينا حق يا أستاذ أحمد
يونس: ونعم بالله، هو أنا ممكن أجهز معاكم الفرشة
عبد الفتاح: طبعاً وطي واقعد وامسك جريدة النخل أهيه
قعدت على ركبي وخدت جريدة النخل وبدأت أعمل كل اللي قالي عليه..
سميت الأول ومشيت بالراحة على الأكفان القديمة البالية المتهالكة وقلت وراه:
بسم الله الرحمن الرحيم
ربنا ينور قبركم
ربنا يريح مرقدكم
ربنا يطيب ذكركم
وببركة القرآن يعلي شأنكم
جايكلم (فلان) الليلة ونسوه وفرحوه وطمنوه
بسم الله الرحمن الرحيم
ربنا ينور قبركم
ربنا يريح مرقدكم
ربنا يطيب ذكركم
وببركة القرآن يعلي شأنكم
جايلكم (فلان) الليلة ونسوه وفرحوه وطمنوه
الحقيقة اني حسيت بمشاعر مختلطة ومتضاربة راحة وقلق ودقات قلبي تسارعت ولوهله حسيت إني فقدت السمع والصوت كله اتكتم واختفى من حواليا!
والحالة دي دبت في قلبي رعب شديد انتهى برجفة شديدة وانتفاضة مني
داود: متخفش متخفش اهدى يا أحمد اهدى
يونس: هو في إيه؟ أنا حسيت إني فقدت السمع!
داود: ما هم كده يبقوا ردوا عليك عشان انت بس دي أول مرة فاتت قلقت..
عبد الفتاح: هم ردهم عليك بيكون انك بتتعزل للحظة عن كل حاجة ولو أنت اتحملت ده كنت هتسمع كلامهم وردودهم..
يونس: طب مش هنطلع
عبد الفتاح: مش حابب تستقبل وتسلم؟
يونس: أستقبل إيه وأسلم إيه؟
عبد الفتاح: الأمانة
يونس: ودي كمان ليها حاجة
عبد الفتاح: لا بس أنت جهزت معانا الفرشة فكمل جميلك للآخر.. عشان تلاقي اللي يجهزلك فرشتك..
يونش: بس أنا ليه عمري ما سمعت عن موضوع الفرشة ده؟
داود: عشان دي حاجة قديمة واخواتنا بتوع الدقون بيقولوا عليها حرام وناس كتير بطلتها
يونس: طب ما بردو وارد كلامهم يكون صح وان ده كله خرافات متوارثة
داود: عالعموم هو قرآن احنا مبنقرأش حاجة حرام وأديك جربت بنفسك ولو شوفتنا عملنا حاجة حرام قول
يونس: بس في حاجة اسمها الابتداع في الدين
عبد الفتاح: اديك بتتكلم بنفس طريقتهم
يونس: خلاص خلاص المطلوب دلوقتي إيه؟
داود: هنستنى الأمانة تيجي
واستنيت وصول الأمانة معاهم
لكن هل الموضوع كان مجرد استلام جثمان ومر مرور الكرام ولا حصل حاجة تانية؟؟
استنوني في الكابوس رقم 2 في العدد الثاني من الخبايا والآن مع القسم الثاني..
التعليقات
للتعليق يجب عليك تسجيل الدخول اولا