آثار باقية

• الكاتب : q8_failaka
• / 2026-01-25

آثار باقية! 

خبية جديدة صاحبتها بتحكي وبتقول:

عندنا في الشارع زمان خالص، بنت كانت عايشة مع أبوها ومرات أبوها، ومرات ابدوها مكنتش بتحبها، وكانت بتغير منها، وتعاملها وحش جداً، ودائماً أبوها يضربها بسببها.

قامت البنت دخلت الحمام، وولعت في نفسها، ودخلوا يطفوها، حطوا عليها بطاطين وملايات، لكن برضه ملحقوش والبنت ماتت

بعد موت البنت بفترة طلعوا الملايات والبطاطين على السطوح، فكان أي حد يطلع على السطح يسمع صريخ البنت ويسمعها بتقول: هي السبب.

لكن مكناش بنشوف شبح لبنت ولا حاجة

جت مرات الأب وخدت كل هدوم البنت والبطاطين بتاعتها ورمتها في الشارع.

أنا كنت معدية فقلت آخد الهدوم واديها لأي حد مسكين زي صدقة على روح البنت اللي ماتت ..

يومها بالليل لما دخلت أنام سمعت أصوات غريبة جداً جاية من الشارع من تحت شباك اوضتي .. مبقتش قادرة أميز هي دي أصوات ايه بالظبط .. إنسان ولا حيوان ولا جن ..

معرفتش أنام بسبب الأصوات دي ..

فتحت الشباك ابص فيه ايه ..

شفت زي حاجة واقفة في العتمة وكأنها بتبص عليا ..

خفت وقفلت الشباك ورجعت أحاول أنام، حسيت إن في حد بيمسكني من رقبتي وبيضغط عليها بقوة ..

ناديت على ماما اللي جت مرعوبة ونامت جنبي.

وفجأة سمعنا صراخ كتير جاي من الاوضة اللي أنا حاطة فيها حاجة البنت ..

بابا لم كل الهدوم ونزل حطها بره الشقة على السلم ..

بعد شوية سمعنا صوت خبط جامد على باب بيتنا .. بابا فتح الباب ملقاش حد. موضوع الخبط ده اتكرر 3 أو 4 مرات .. وبعدين وقف لما شغلنا قرآن في البيت.

تاني يوم اتخلصت من هدوم البنت ومتكررش الموقف ده تاني

وعدت الأيام ..

كل فترة بقينا نسمع صراخ جامد وصويت جاي من فوق السطوح .. وساعات كنا بنشوف حاجة زي نار مولعة ..

بس الموضوع منتهاش ...

مرات أبو البنت كانت طالعة في يوم السطوح، البنت دي أو قرينها أو عفريتها ظهر لها وفضلت تصرخ في وشها وتقولها هموتك أنت السبب ..

فضلت تصرخ لغاية لما أغمي عليها ..

بعد كدا مرات الأب كانت بتقول أن عفريت النت بقى يظهر لها في كل مكان وبتيجي في أحلامها تمسك في رقبتها وتخنقها ..

بس الناس مصدقتهاش خالص، وفضلت على الحالة دي في كل حتة تروحها تشوف روحها، لحد ما عرفنا إنها اتجننت.