من داخل الحيطان للكاتب أحمد يونس

• الكاتب : q8_failaka
• / 2025-11-03

من داخل الحيطان! 

(و) من أصدقاء نادي الخبايا بتحكي وبتقول أنا كنت ساكنة في مدينة جامعية، وفي يوم كنت سهرانة لقبل الفجر، وصحابي كلهم نايمين، سمعت أصوات غريبة زي مايكون حد بيحفر ف الحيطة بضوافره، والسقف زي مايكون هيقع ..

للعلم أنا اوضتي في الدور التالت، ومع ذلك محدش من أصحابي حس بحاجة ..

بعد شوية سمعت صوت كلب بينبح بصوت عالي وغريب، جاي من البلكونة اللي كان بابها مقفول .. شفت أكرة البلكونة بتتحرك كأن في حاجة عاوزة تدخل عندي ..

جسمي كان متخشب ومقدرتش انطق ومقدرتش أنادي حد. وبصعوبة كبيرة قدرت أحرك ايدي، واشغل قرآن على التليفون ..

كنت خايفة اووي .. وفضلت ادعي ربنا واستغفر كتير .. وبعدين كل شيء هدي وجسمي رجع لحالته وقمت من على السرير ..

صحيت أصحابي وحكيت لهم على اللي حصل، بس طبعا محدش صدقني وافتكروني بخرف أو بحلم ...

واحدة معايا في الجامعة قالت إن ممكن ده يكون هو الجاثوم .. سألتها أيه هو الجاثوم؟ قالت انه نوع من أنواع الجن خبيث، وطلبت مني أتوضأ واقرأ أذكار المساء قبل ما أنام

رجعت وأنا عمالة أفكر في كلامها .. وبصراحة معملتش حاجة من اللي قالت عليها..

بعد كدا الموقف اللي حصل معايا اتكرر مع زميلاتي في السكن هما كمان ...

كل يوم كانت بنت من أصحابي تحكي أنها شافت حلم بشع، أو حست بظوافر طويلة على كتفها ..

بدأنا نصدق أن في حاجة غريبة في الاوضة دي ..

مرة كنت سهرانة بذاكر حسيت إن شيء بيشد شعري، وكل الكتب بتاعتي وبتاعت زميلاتي بقت تطير وتقع على الأرض، والسقف بدأت تنزل منه نقط ميه لونها أسود.

خلال الوقت ده عرفت إن الاوضة بتاعتنا فوقها مباشرة أوضة محدش ساكن فيها ..

أخدت نفسي أنا وأصحابي وطلعنا فوق نشوف ايه حكاية الاوضة اللي فوقنا دي ..

اكتشفنا أن الأوضة دي مقفولة لأن كانت بنت من كام سنة ساكنة فيها ودايما أصحابها يعايروها لأنها كانت بتعرج .. البنت بسبب كلام البنات انتحرت .. ويقال أن قرينها لسة موجود مكان ما انتحرت، عشان كذا قفلوا الاوضة بتاعتها.

طلبنا طبعا أننا نغير الاوضة من الإدارة، ووافقوا ..

والاوضة اتقفلت ومحدش كان راضي يسكن فيها هي كمان.

أرجوكم .. خلوا بالكم من كلامكم .. الكلمة كالسهم القاتل، إن خرجت لا تعود.