العتبة المشؤومة للكاتب أحمد يونس

• الكاتب : q8_failaka
• / 2025-10-18

العتبة المشؤومة! 

صديقة أخرى لنادي الخبايا بتقول أنا (ن.م) عمري 29 سنة من القاهرة.

لما كان سني 13 سنة كنت دايماً بحلم اني قاعدة في شقتنا ومعايا اخويا وبابا .. والباب بتاع الشقة عمال يخبط جامد .. ومفيش حد راضي يقوم يفتح الباب .. وافضل أقولهم افتحوا الباب، يبصوا ليا وميتكلموش خالص .. وبعدين بلاقي الباب بيتفتح لواحده وبيدخل راجل شكله وحش جداً، ملامحه مخيفة ..

بيمشي جوه الشقة كأنه واحد مننا وعارفها كويس .. وبعدين بيقرب مني، ويحاول أنه يمسكني ..

كنت وانا في الحلم بصرخ في بابا واخويا عشان يبصوا وينقذوني .. لكن ماحدش كان بينتبه لي خالص.

وبيخلص الحلم اني بصحي مفزوعة وافضل أعيط .. حكيت لبابا في الأول فقالي ان ده كابوس ..

لكنه اتكرر بعد كذا معايا كتير، لغاية لما بابا حس أن في حاجة مش مظبوطة ومش قادرين نفهمها ..

ماما راحت لصاحبة البيت الحاجة (فريدة) وحكتلها اللي بشوفه ..

الحاجة فريدة قالت أنها متعرفش حاجة وان أول مرة حد يشتكي من الشقة .. وبعدين قالت لماما أنها تقدر تجيبلنا شيخ يشوف الموضوع ده بس بعد يومين ..

وفعلاً بعد يومين بالظبط، وحوالي الساعة 11 بالليل جه الشيخ .. هو جه متأخر عشان منعملش شوشرة على البيت والسكان.

الشيخ مكنش زي ما توقعت كبير في السن وله دقن بالعكس كان إنسان عادي جداً، لابس بنطلون جينز وقميص، بس عينيه كان لونها غريب ..

المهم قعد معايا، وحكيتله اللي بشوفه ..

؛قالي ماشي .. وبص لبابا وقاله: هنحتاج نعمل جلسة، ودخل اوضة ضلمة، وعايز الشقة كلها تضلم بس نور بسيط، ومحتاج صينية مدورة ومفتاح.

جبناله كل اللي طلبه وجهزنا المكان زي ما هو عاوز ..

الشيخ طلع قلم، ورسم مربع وجواه مربعات صغيرة وفيها حروف أو أرقام، ماكنتش قادرة أحدد ..

وبعدين دخل الاوضة بتاعتي وقال لما الباب يخبط تدخلي يا نسمة مع أخوكي وباباكي ..

وفعلاً دخل وبعد عشر دقايق تقريباً، سمعنا خبط على باب الاوضة فدخلنا ..

الاوضة مضلمة ومفيش إلا نور شمعة صغيرة جداً .. الشيخ كان قاعد على الكنبة والصينية قدامه وفيها المفتاح، فضل يقول كلام مش مفهوم، والمفتاح كان بيتشال ويخبط في الصينية، وبعدها الصينية لفت بسرعة واترمت قدام رجلي. أنا اتخضيت وصرخت وطلعت جري بره ..

بعد شوية خرج ورايا الشيخ وقال: خير يا جماعة هي كانت مأذية من جن بسبب أنها بتفتح ماية سخنة في الحمام كتير، وأذت جن وكان عايز يمسها ..

بعدين الشيخ طلع ورقة من جيبه ملفوفة زي الحجاب وحواليها خيط اسود مليان عقد، واداها لماما وقالها تحطها 3 ليالي تحت المخدة بتاعتي اللي بنام عليها.

وفعلاً ماما عملت كدا والحمد لله من يومها وبقيت بخير.

* * *