الاختبار

• الكاتب : q8_failaka
• / 2025-08-09

خباياكم 

الاختبار!

صديقة جديدة لنادي الخبايا .. بتحكي وبتقول أنا اتولدت بإعاقة حركية .. الحمد لله أنا متقبلة نصيبي وقضاء ربنا، ويعتبر أن الاختبارات الصعبة بتكون للأشخاص اللي إيمانهم قوي.

المهم إن أهلي وانا صغيرة بعد مازهقوا من اللف على الدكاترة عشان أتعالج، في واحد اقنع والدي أن المرض اللي أنا فيه بسبب عمل أو جن، واني لازم أروح لحد يفك العمل اللي عليا، والذي كان زي الغريق اللي بيتعلق بقشاية وصدق الكلام. وبعدين سأل لغاية لما ناس دلته على شيخة في القاهرة اسمها (سندس) لها كرامات ومخاوية جن زي ما بيقولوا.

المهم سافرنا لها وكنا فاكرينها لوجه الله، لكن من أول جلسة خدت فلوس كتير 400 ج تقريباً (كان مبلغ كبير وقتها)

مسكت كتاب غلافه أسود وفضلت تقرأ منه وتردد كلام مش مفهوم وبعدين قالت اني عليا سحر ومربوط في السحر خمس عقد، وعشان العقد تنفك عشان أقدر امشي لازم تعمل اللي هتقول عليه ..

والدي قالها إن أي حاجة هتطلبها هو هينفذها

الشيخة سندس قالت أن عشان السحر اللي عليا يتفك لازم أبات أسبوع في الضلمة لوحدي، واديتنا زي حجاب أحطه حوالين رقبتي

رجعنا من عند الشيخة سندس، وتاني يوم والدي دخلني في أوضة وخلع منها كل لمبات الكهرباء، وقفل عليا الباب.

أول ليلة نمتها في الأوضة دي صحيت على صوت همس حد بينفخ في ودني ..

فتحت عيني ..

بالرغم من أن الدنيا ضلمة لكني شفت زي راجل طويل قوي لدرجة أن رامه كانت واصلة لسقف الاوضة؟ مد ايده وبدأ يلمس جسمي، وأنا بصرخ لكن الصراخ مكنش بيطلع مني. غبت عن الوعي، وبعد شوية صحيت تاني لقيت نفسي مربوطة على السرير وقدامي الشيخة سندس وحواليها ناس طويلة وعينيهم حمرا ..

الشيخة سندس كانت ماسكة طبق وفيه حاجة زي الحمص وكل شوية ترمي منه عليا ..

قلتلها انتي بتعملي فيا ايه

مردتش وفضلت تقول (يا ابن المارد طهيون .. يا سليل قبيلة الجن الأحمر .. أبلغك بأنك طليق .. احضر كما كنت حيث الأحمر يمينك والعدم يسارك .. عد حراً ومعك خدامك)

فضلت تردد الطلسم ده لغاية لما غبت عن الوعي تاني حكيت لبابا، تاني يوم عن اللي حصل لكنه مصدقنيش ..

واتكرر موضوع النوم في الضلمة .. كل يوم من 6 مساء لغاية 6 الصبح، ومنعوني أكلم حد ..

وبعد ما الأسبوع عدى، حالتي ساءت اكتر ..

بقيت اسمع أصوات بالليل، وأشوف خيالات جن وعفاريت كل ما ادخل الحمام ..

بقيت أخاف ابص في المراية.

في يوم كانت الساعة 2 بالليل، كنت نايمة في الاوضة، حلمت بواحدة س ت قاعدة على طرف السرير بتاعي وعينيها بصالي .. كانت جدتي الله يرحمها، وقالتلي: ازيك أنا جايالك علشان وحشاني وعاوزة أخدك معايا.

وفجأة تحولت وبقى شكلها مرعب، شعرها بقى مجعد، عضم وشها طلع لبره، وعينيها ابيضت تماماً.

وفضلت تخنقني وانا مش قادرة أقاوم وعمالة اصرخ بس صوتي بيخرج بصعوبة، لغاية لما صحيت مفزوعة.

بعد كدا لما تعبت أكتر وبقيت أصرخ طول الوقت والدي وداني الشيخ تاني. الشيخ ده خلاني أتوضأ وبعدين قرأ عليا قرآن

وقالنا إن جالي مس من الجن بسبب الشيخة سندس

اتكررت زيارتي للشيخ ده لغاية لما خفيت من مس الجن، وهو بالمناسبة شيخ مشهور وكان بيجي في التلفزيون لكنه مات من كام سنة

أما بالنسبة للشيخة سندس فأنا سمعت إن جيرانها لقوها ميتة في بيتها .. بس السرير اللي لقوها عليه كان محروق.

ايه اللي حصل. معرفش. بس اللي أعرفه إن ربنا منتقم جبار