الكابوس 2
فضلت طالع نازل على درجات السلم بتاع التربة مستني وصول جثمان قريبي ونظرات داود وعبد الفتاح بتلاحقني، ومع أصوات لا اله إلا الله وإنا لله وإنا إليه راجعون أدركت وصول الجثمان ...
طلع داود وعبد الفتاح درجات السلم وأنا وراهم لاقيت نعش في وشي بيتحط على الأرض.
وجواه جسم ضعيف نحيف ملفوف في الكفن الأبيض في استسلام مستني آخر ايدين بشرية هتشيله وتنقله لمثواه الأخير، تكالبت الناس على الجثمان في مشهد فكرني بأفلام الزومبي وكأنهم هيفترسوه!
ورفعوه بسلاسة ويسر وناولوا الجثمان لعم داود وعبدالفتاح وأنا!
لقتني غصب عني بشاركهم وإلا الجثة هتقع منهم!
ونزلنا على السلم كنت نازل بضهري لأني كنت آخر واحد وراهم، هم كانوا درجتين تلاتة لكني حاسس أني ماشي في طريق من كام سنة، وخصوصاً لما حسيت بشكة في رجلي من تحت الجزمة فهزيت رجلي في حركة لا إرادية ولكن هزة رجلي خلت توازنا يختل وغصب عني اتكعبلت على ضهري ووقعت ووقعت معايا الجثة!!
لاقيت عبد الفتاح وداود بيزعقوا في وقت واحد، وسمعت من برا أصوات متداخلة بتقول
الميت وقع
يا ستار يا رب
ده مش عاوز يتدفن
أعوذ بالله
ده الشاب اللي معاهم هو اللي وقعه
لا ده اتكعبل به ادعوا واستغفروا يا جماعة!
كل ده بيتقال وأنا في ملكوت تاني
اتخيل معايا أنا واقع على ضهري في الرمل
حاجات جامدة تحت ضهري
ومع وقوعي سمعت صوت حاجات بتطرقع وبتكسر تحت مني
وفوق مني واحد ميت! أيوه ميت
ميت وبرغم جسمه الهزيل إلا إني حاسس بأن فوقي فيل طابق على تفسي!
كل اتصالي بالعالم الخارجي اتقطع
صمت تام
لكن سامع صوت حد بيتنفس نفس ضعيف جداً
وحاسس بحرارة شديدة بتجتاح جسمي كله!
ودقات قلبي أشبه بطبول فيلم جومانجي اللي لسه بخاف لما يسمعها لحد دلوقتي!
مش عارف أعمل ايه ولا أتصرف ازاي!
حاسس كأن الجاثوم هو اللي فوقي
لا قادر أحرك ايدي ولا أي عضو من جسمي
لا قادر انطق ولا افتح بوقي
وبردو مش فاهم سر عدم تدخل عبد الفتاح وداود لإنهاء المصيبة اللي أنا فيها دي!!
بدأت احس بحاجة غريبة جداً بدأت احس اني بغرق جوا الرمل جسمي بيغوص حرفياً جواه!
في اللحظة دي بدأت أقول:
ربي أعوذ بك من الشياطين
ربي اني ظلمت نفسي
ربي نجني
لا إله إلا أنت سبحانك إني كنت من الظالمين
ظهر قدامي فجأة أخيراً داود وعبد الفتاح وشدوني بعد ما شالوا الجثة من عليا!!
قعدت في الأرض أكح وهم حطوا الجثة على القبلة وأنا عيني على العضم المتكسر اللي أنا كسرته ومن خلال ضوء الكشاف شوفت العضم
كان عضم وجماجم أنا وقعت عليها وكسرتها!
خلصنا اللي عملناه وخرجنا والكل بيبصولي الشاب اللي وقع الجثة قبل ما يدفنها!!
- حابب أقولكم كام حاجة:
لما روحت لاقيت التهاب حاد في رجلي مكان الشكة اللي حسيت بيها في القبر وفضلت أتعالج منه ما يزيد عن أسبوع!
ولاقيت في ضهري مكان مدور عبارة عن شكل جمجمة من الجزء الأعلى منها معلم على ضهري!
بعد كام يوم قابلت داود وعبد الفتاح ولما عاتبتهم انهم سابوني كل ده الاتنين أقسموا انه محصلش أي حاجة من ده!
وإن كل اللي حصل اني اتكعبلت ووقعت وهم جريوا عليا شالوني وانهم ولا سابوني ولا حاجة من الكلام ده!
من يومها وبقيت كل ما أروح جنازة أقف قدام القبر وأقول:
بسم الله الرحمن الرحيم
ربنا ينور قبركم
ربنا يريح مرقدكم
ربنا يطيب ذكركم
وببركة القرآن يعلي شأنكم
جايلكم (فلان) الليلة ونسوه وفرحوه وطمنوه
بسم الله الرحمن الرحيم
ربنا ينور قبركم
ربنا يريح مرقدكم
ربنا يطيب ذكركم
وببركة القرآن يعلي شأنكم
جايلكم (فلان) الليلة ونسوه وفرحوه وطمنوه
استنوني في الكابوس رقم 3 في العدد الثالث من الخبايا
التعليقات
للتعليق يجب عليك تسجيل الدخول اولا