جنب الجبانة!
- (من أصدقاء نادي الخبايا) بيقول.
مرة كنت بايت عند ناس قرايبي، والبيت ده كان في منطقة ريفية جنب المقابر، بمنطقة ضلمة جدا، وترعب.
الأوضة اللي كنت بنام فيها، كان في شباك آخر الأوضة أنا فاكر شكله كويس، كان مفتوح واحنا أصلاً في الدور التاني.. رحت في النوم 10 دقايق بالظبط.. ولما فتحت عيني لقيت فوق السرير جنبي قطة سودا ومدياني ضهرها.
استعذت بالله من الشيطان الرجيم.
حركت رجلي شوية وببص عليها لقيت رجلي بقت سودا تقريباً زي المحروقة.
صرخت من كتر الرعب وأنا خلاص قلبي كان هيقف لحد ما خالي جه وقالي سلامتك تلاقيك بتحلم.
بصيت على رجلي لقيتها رجعت لشكلها تاني وكمان القطة اختفت
قولت يمكن كنت نايم فعلا وده حلم الله أعل
تاني يوم محصلش حاجة وبعدين كنت معدي بالليل قدام المقابر مع ابن خالي واتراهنت معاه اني ممكن أدخل المقابر.. بدأت أخاف.
فضلت أنده على ابن خالي بصوت عالي لكن مفيش أي رد.
فجأة شفت قبر الباب بتاعه مفتوح.
ومن جوه القبر حسيت شيء بيتحرك.
أنا تجمدت في مكاني.
بعد شوية شفت حاجة سودا مقدرتش أميز إيه هي.. وسمعت صوت خشن بيقول هتنزل هنا ده مكانك الجديد وكررها مرتين
جريت بسرعة لغاية لما خرجت من المقابر.
محكتش لأي حد عن اللي حصل.
لكن بعد كدا لما أصحى من النوم بقيت ألاقي خرابيش على جسمي زي خرابيش القطط.
أبويا لما عرف الموضوع وداني لواحد شيخ.. فضل يقرأ عليا قرآن واداني ميه وقالي استحمى بيها في يوم جمعة
عملت كل ده.
بس لسه برضه مفيش حاجة اتغيرت.. أنا خايف فعلا يكون يوم موتي قرب. أرجوكم. ادعولي ربنا ينجيني
............م.......
التعليقات
للتعليق يجب عليك تسجيل الدخول اولا