المنطقة الصناعية!
- (صديق الخبايا) بيحكي وبيقول
أقسم بالله حصل كنت شغال في مصنع في أكتوبر لمنتج مشهور جدا، وكنت شغال وردية ليلية وفي يوم كنت مطبق وتعبان جدا..
زميلي كان ماسك مخزن صغير كده في المصنع لما شافني تعبان قالي تعالى نام ساعتين كده في المخزن وأنا هبقى مكانك ومحدش هياخد باله
وافقت طبعا من التعب ودخلت، قفلت الباب والنور وفرشت كرتونة ونمت عليها
قبل عنيا ما تروح في النوم شوفت قطط سودا جاية تجري عليا، قومت مفزوع بسرعة وفتحت النور، ملقتش حاجة
قولت يبقى من التعب، قفلت النور ورجعت نمت
صحيت على صوت حد بيمسك دماغي. التفت أشوف مين ده. لقيت شيء أسود طويل.. هو مكانش بشر ولا حيوان أنا فعلا مكنتش عارف أحدد إيه هو.. كان عامل زي كتلة من السواد وعمالة تتحرك. أنا ما بقتش عارف أنا بحلم ولا بيتهيألي ولا إيه.. فضلت أدعك في عيني وأغمض وأنا بقرأ المعوذتين وفجأة الراجل ده اختفى واتحول لدخان وكأن لم يكن
استعذت بالله من الشيطان الرجيم وفتحت النور تاني ملقتش حاجة.. بس شفت مكان الشيء اللي ظهر كومة كبيرة من التراب لونه أحمر مكنش موجود قبل كدا.
فجأة سمعت صوت في المخزن. جيت أتحرك حسيت إني مشلول كلياً، مفيش حاجة فيا بتتحرك ولا عارف أنطق حتى، بس كنت سامع صوت طفلين بيضكوا وبيجروا وراء بعض..
فضلت أقرأ آية الكرسي لغاية لما كل حاجة هديت، وبعدها خرجت من المكان ده ودي كانت آخر مرة أدخله
التعليقات
للتعليق يجب عليك تسجيل الدخول اولا