الورثة

الورثة!

- الخبايا الجاية بيرويها (ح) من مصر، وبيقول

إنه ساكن في بيت ورثه عن والده..

كان جيرانهم ناس طيبين، وكل واحد في حاله..

بس وسط الجيران الطيبين دول كانت في واحدة ست الناس كلها بتخاف منها..

هي عايشة في البيت بتاعها لوحدها وملهاش اختلاط مع حد..

كانت كبيرة في السن، وبتلبس دايما ملابس سوداء.

حاتم بيقول إنه ساعات كان بيشوفها بالليل، طالعة فوق سطح بيتها، وبتفضل تدور حوالين نفسها، وتتمتم بكلام مش مفهوم..

كان في إشاعة بتقول إن الست دي مخاوية جن، أو إنها بتعمل أعمال سفلية.

بيقول كمان أن مرة سمع صرخة عالية خارجة من بيت الست دي، الصرخة كانت كأن ناس كتير بتصرخ في وقت واحد..

وبعد مده مبقاش حد يسمع حاجة أو يشوف الست دي..

محدش حط في باله..

كل واحد مشغول في حياته وهمومه.. بس بعد مدة الناس بدأت تشم ريحة وحشة طالعة من بيتها، وكل يوم كانت الريحة بتزيد..

الناس راحت تخبطت، وفضلت تنادي عليها لكن مفيش رد، اتصلنا بالشرطة اللي جت وكسرت الباب.

بمجرد ما الباب اتكسر الريحة الوحشة اتضاعفت، ولما دخلنا البيت من جوه كان ضلمة قوي، ومليان تراب، والحيطان عليها زي خرابيش، وكان في ريش أسود على الأرض..

الست مكنش لها أثر..

دخلنا أوضة النوم ندور عليها، سريرها كان فاضي، بس المرتبة بتاعتها كان كأنها محروقة أو شايطة.

دورنا في الأرض لغاية لما وصلنا الحمام، جوه الحمام شفنا حاجة غريبة، لقينا الست أو الهيكل العظمي بتاعها نصه جوه الحيطة ونصه بره.

في ناس افتكرت إن في حد قتلها ودفنها جوه الحيطة لكن المشهد مكنش كدا..

المشهد كان كأن في شيء سحبها جوه الحيطة، ونصها دخل جواها ونصها التاني بره..

كمان ايديها كانت ممدودة لقدام، كأنها كانت بتستغيث أو بتحاول تنقذ نفسها.

بعد كدا لقينا كتب كتيرة عن السحر وتحضير الجن في بيتها..

وطلعت إشاعة إنها كانت بتحضر جن، وإن الجن اللي حضرته سحبها معاه..

الله أعلم الحقيقة فين..

بس الست دي ماتت موتة بشعة جدا..

ربنا يحفظنا وينجين

التعليقات