غسل الموتى

• الكاتب : q8_failaka
• / 2025-02-25

غسل الموتى! 

- خبايا صاحبتها من الجزائر واسمها ؟...)

بتحكي كانت في زيارة لقريبتها.. قريبتها دي كانت ست كبيرة في السن وعايشة لوحدها، وبعد ما قعدت معاها شوية طلبت منها انها تيجي توصلها للحمام.. وفعلا وصلتها جوه الحمام لكن أول لما دخلوا الست الكبيرة بدأت تتشنج ووقعت على الأرض.

رغوة لونها صفراء خرجت من بوقها وعينيها اتقلبت بيضاء..

بسرعة البنت جريت نادت الجيران اللي جم بسرعة.. لما وصلوا كانت الست الكبيرة دي ماتت..

فوجئت إن الجيران بيقول إن اللي بيموت في الحمام بيفضل قرينه يتعذب ويظهر وكلهم خرجوا وهما مرعوبين..

بصراحة هي مصدقتش الكلام ده..

وفي وقت غسل الجثة طلبوا منها تكون موجودة..

لما دخلت تشوف الغسل فوجئت إن جثة الست كل لما تتحط على خشبة الغسل تتزحلق لوحدها من غير سبب..

المغسلة بقت محتارة من اللي بيحصل.. كانت أول مرة تشوف حاجة زي دي..

قربت الصديقة صاحبة الخبايا تبص على الجثة ولاحظت إن وشها منفوخ ولاحظت كمان إن في سواد خارج من رأسها ونازل على رقبتها. السواد ده مكنش موجود قبل كدا..

وبعدين فجأة وهي واقفة لقت نفسها واقفة لوحدها قصاد الميتة ومفيش حد معاها.. مبقتش عارفة هي صاحية ولا ده حلم ولا إيه..

لحظة والجثة اتحركت من مكانها واتعدلت على خشبة الغسل ولفت وبصتلها..

فضلت الميتة تبص لها وحشرات كتيرة زي النمل يخرج من رأسها.. بعد شوية بدأت تصرخ بصوت عالي جدا كأنها بتتعذب..

كل ده ونوال واقفة مش قادرة تتحرك.

غمضت عينها وفضلت تقرأ قرآن.. ولما فتحت عينيها لقت كل حاجة رجعت لطبيعتها وشافت الجثة على خشبة الغسل والمغسلة بتلفها في الكفن الأبيض، وبعد لما لفتها ربطت الكفن كويس بحيث ميتفكش..

المغسلة أدت للصديقة صاحبة الخبايا ميه الغسل وطلبت منها تفضيها بنفسها في الحمام لأن في ناس بتأخد مية الغسل وبتستخدمه في أعمال السحر.. وفعلا عملت كدا

أما بالنسبة للصابون والليفه فخدتهم وحرقتهم.

وبعد لما انتهت الجنازة ودفنوا الميتة، الصديقة صاحبة الخبايا رجعت بيت الميتة تلم حاجتها، وهناك لقت تحت السرير صندوق مليان حتت قماش قديمة متقطعه على هيئة عرايس صغيرة ومغروز فيها ابر ومسامير حديد.

اكتشفت ان قريبتها دي كانت بتعمل أعمال وبتمارس سحر أسود..

بس مش ده الشيء المرعب في الموضوع.. المرعب تاني يوم الصديقة صاحبة الخبايا كانت نايمة وصحيت على صوت الست الميتة بتنادي عليها

لما فتحت عينيها لقتها واقفة قدامها وبعدين صرخت في وشها. وفي جزء من الثانية اختفت.

الموضوع ده اتكرر أكتر من مرة لغاية لما والد نوال استعان ب 3 شيوخ جم البيت وقروا عليها قرآن ومن يومها مفيش أي حاجة غريبة حصلت وحالياً نوال عايشة حياتها بشكل طبيعي جدا.