سيندريلا!
- وإلى خبايا صديقة (م. ه) بتحكي وبتقول:
عندنا في الشارع زمان خالص، بنت كانت عايشة مع أبوها ومرات أبوها، ومرات أبوها مكنتش بتحبها، وكانت بتغير منها، وتعاملها وحش جدا، ودائما أبوها يضربها بسببها.
قامت البنت دخلت الحمام، وولعت في نفسها، ودخلوا يطفوها، حطوا عليها بطاطين وملايات، لكن برضه ملحقوش والبنت ماتت
بعد موت البنت بفترة طلعوا الملايات والبطاطين على السطوح، فكان أي حد يطلع على السطح يسمع صريخ البنت ويسمعها بتقول: هي السبب.
جت مرات الأب وخدت كل هدوم البنت والبطاطين بتاعتها ورمتها في الشارع.
عدت الأيام..
مرات أبوها كانت طالعة في يوم السطوح، البنت دي أو قرينها أو عفريتها ظهرلها وفضلت تصرخ في وشها وتقولها هموتك أنت السبب..
فضلت تصرخ لغاية لما أغمى عليها.
بعد كدا كانت بتقول إن عفريت البنت بقى يظهرلها في كل مكان وبتيجي في أحلامها تخنقها.
بس الناس مصدقتهاش خالص، وفضلت على الحالة دي في كل حتة تروحها تشوف روحها، لحد ما اتجننت.
بس الموضوع منتهاش..
كل فترة بقينا نسمع صراخ جامد وصويت جاي من فوق السطوح.. وساعات كنا بنشوف حاجة زي نار مولعة..
من ساعتها محدش سكن في الشقة دي ولا قرب من السطوح
التعليقات
للتعليق يجب عليك تسجيل الدخول اولا