بيت العيلة!
- صاحبة الخبايا التالية بتقول:
أنا عندي 42 سنة، عايشة مع جوزي في بيت عيلة كبير من 3 أدوار، في البداية كنت عايشة مع جوزي في شقة راقية، لكن بسبب الظروف المادية، اضطر جوزي يبيع الشقة، وانتقلنا لبيت عيلته، أهل جوزي كانوا عايشين في البيت ده من سنين طويلة.
بعد شهر في البيت ده كنت سهرانة بتفرج على التليفزيون، جوزي يدخل ينام وأنا فضلت قاعدة لوحدي، حوالي الساعة 2 صباحاً، سمعت ضحك مكتوم، الصوت اتكرر 3 مرات، كان ضحك بنت صغيرة، وكان جاي من الدور الثاني، قدرت أطلع فوق أشوف إيه الموضوع، طلعت فوق فلمحت زي خيال كورة، ووراها ظهرت بنت صغيرة بتجري وبعدين اختفوا..
صرخت صرخة صحت جوزي اللي جه جري، حكيت له كل اللي حصل كلنه فضل يهديني، لما دخلنا ننام كنت حاسة ان في حد أو شيء عمال يراقبني، مكنتش عاوزة أنام لكن بعد مدة نمت، فجأة حسيت بحاجة بتلمس جسمي، فتحت عيني شفت ضل أسود، مالوش ملامح، لكن عيناه كانت حمراء وبتبرقلي، في لحظة اختفى تماماً.
صحيت جوزي اللي فتح الكاسيت على إذاعة القرآن، وفضلنا طول الليل صاحيين.
الموقف ده متكررش تاني، وفضلنا كام شهر مفيش حاجة، وفي يوم جوزي كان مسافر في مأمورية شغل، ورجع متأخر، طلبت منه يغير هدومه، عقبال ما أجهز له الأكل.
وأنا في المطبخ، سمعت صوت ضحكة مكتومة، بعد شوية خبط جاي من أوضة النوم، ولقيت جوزي جاي ووشه متغير، وقالي يلا بينا، هنسيب البيت حالاً.
لما سألته بعد كدا هو شاف إيه؟
قال إنه شاف بنت صغيرة قاعدة على الأرض، وجنبها راجل عجوز، وان الاتنين كانت عينيهم بيضاء، وعاملين زي الأموات.
التعليقات
للتعليق يجب عليك تسجيل الدخول اولا