البحث عنهم!
صاحبة الخبايا دي بتقول: أنا من طفولتي متعودة على الوحدة.. بصفة عامة أنا عندي حالياً 17 سنة وبدأت المشكلة دي وأنا عندي 13 سنة.
أنا كنت بحب أقرأ عن الجن كتير، وأبحث كتير على الانترنت لدرجة وصلت للادمان.. كنت بحب أسمع وأعرف كل حاجة عن علم الجن.. تقريباً اللي أنا عملته ده خلى حاجات تحس بيا أو تحاول تتواصل معايا
بمرور الوقت بدأت أحس بوجود أشخاص حواليا مش شايفاهم.. وكما بقيت أكره صوت الأذان، مش بكرهه حرفياً بس بتضايق لما أسمع صوت أي أذان
أنا حسيت بالتغيرات دي وبطلت أقرأ خالص عن الجن.. لكن تقريباً هو الوقت كان فات
بدأت أحلم أحلام غريبة. الحلم الأول شفت فيه طفل جن، معرفش ازاي عرفت إنه جن في الحلم مع أنه على هيئة إنسان بس إحساسي إنه جن.. كان واقف قدامي وعمال يكرر كلام مش مفهوم، كان كأنه بيقرأ عليا سحر أو تعويذة.. كان كل ما يتكلم جسمي كله يتجمد في بعضه، لدرجة إن حسيت إني هتخنق.. وفجأة صحيت من الحلم على صوت ماما وهي بتصحيني.
تاني يوم حلمت حلم مختلف.. حلمت إن بنت صغيرة لها ودان كبيرة عاملة زي ودان وفضلت تردد نفس الكلام اللي مش مفهوم.. المرة دي أنا جريت من قدامها ناحية أوضة ماما. لما وصلت لأوضة ماما لقيت على سرير ماما ست عجوزة لابسة ملاية زي بتوع الفلاحين زمان وعنيها كلها بيضاء وبتبصلي.. وبعدين قالتلي: متخفيش احنا كمان بنحبك زي ما انتي بتحبينا
بعد اليوم ده بقيت أشوف خيالات غريبة في الأوضة.. مره وأنا لوحدي والنور كله مطفي ونايمة عادي، حد دخل عليا الأوضة مش شايفة مين والدنيا ضلمة، والله أنا كنت نايمة معرفش ازاي نايمة ومغمضة عيني وشايفة بس أقسم بالله دا اللي حصل، والشخص أو الجن أو أي كان الكائن ده، قرب نحيتي وكان طويل جدا وعريض ولونه أسود زي الفحم. وبعدين مد ايده على دماغي وملس عليها، وبعدها نزل ايده على بطني وبصباعه فضل ماشي لحد رقبتي. وعمل حركة على رقبتي زي حركة الدبح، كأنه بيهددني واختفى بعدها.
يادوب قدرت أتحرك قومت جري فتحت النور.. كان جسمي كله ميه وعرق كأني بجري بقالي سنين. رحت لماما حكيت لها، فضلت تقولي بتهيألك ده حلم ومتخافيش.
مكنش حد من أصحابي مصدقني.. أنا حيكت بس لاتنين من أصحابي فضلوا يضحكوا.. لكن تاني يوم لقيتهم بيتصلوا عليا وهما مرعوبين.. بيقولوا أن ظهرلهم ولد صغير وفضل يردد كلام مش مفهوم.
أنا اسفة لو كنتوا بتسمعوا كلامي دلوقتي.. لو ظهرلكم طفل أو بنت صغيرين أرجوكم متخافوش.. الموضوع بسيط.. دول جن بيحبوكوا زي ما انتم بتحبوهم
..........
التعليقات
للتعليق يجب عليك تسجيل الدخول اولا