غيطان الظلام للكاتب أحمد يونس

• الكاتب : q8_failaka
• / 2025-01-28

غيطان الظلام! 

- خبايا جديدة بيحكيها لينا (م).. بيقول

أنا كنت بحب في الإجازة أسافر الريف عند أهلي في الصعيد.. كنت بحب اتمشى أنا وصحابي في الغيطان بين عيدان القصب..

في أحد الأيام أنا كنت زهقان وملقتش حد من أصحابي يجي معايا، فخدت نفسي وروحت اتمشيت في الغيط شوية لحد لما وصلت عند دخلة الترعة..

بالصدفة لمحت كورة صغيرة مرمية هناك.. وطبعا زي أي طفل في الوقت ده كنت عاوز الكورة..

نزلت تحت لغاية لما وصلت على طرف الترعة.. كان بيني وبين الميه يدوب نص متر بالكتير. فجأة شفت راجل منظره غريب ورقبته بتنزف دم..

الراجل فضل يدور حوالين نفسه في دواير.. وبعدين وقف فجأة.. دماغه لفت ناحيتي بزاوية 180 درجة.. وبص ليا وقالي بصوت خشن: اوعى تيجي هنا مرة تانية.

طلعت أجري لحد البيت.. وبعدها اكتشفت إن كان فيه واحد مدبوح في الحتة دي..

سألت أبويا على شكله قالي أسمراني بدقن، وفعلا كانت هي دي مواصفات الراجل اللي شفته..

المشكلة إني فضلت كل يوم أحلم بيه.. لغاية أول امبارح أنا كنت مروح البيت، ومجرد ما دخلت أوضتي لقيت الكورة اللي كنت شفتها على طرف الترعة موجودة على سريري.. أنا خايف.. مش عارف اتصرف ازاي.