معلومة من نادي خبايا للكاتب أحمد يونس

• الكاتب : q8_failaka
• / 2024-12-20

معلومة مخيفة من نادي الخبايا صدقها أو لا: 

في أكثر من مناسبة قال عدد من شهود العيان بأنهم شاهدوا ملوك الجن في أماكن عامة وأمام مجموعة غير قليلة من الناس، وأشهر تلك المرات عندما ظهر الملك شمهورش في بلدة مغربية منذ سنوات، والبعض قام بتسجيل مقاطع فيديو لظهور ملك الجن لكنها حظت بانتقادات تقول أنها مجرد حيل بصرية، وهذه الظهورات الخفية للجن لا تحظى بدعم علماء الأديان المختلفة..

إليكم بعض أسماء كتب ومخطوطات هامة عن السحر وملوك الجن الممنوع تداولها وكل الموجود منها نسخ مبتورة غير كاملة

كتاب الجواهر اللماعة في استحضار ملوك الجن

كتاب بهجة السامعين في تسخير ملوك الجن أجمعين

 

ونعود لخباياكم

الحديث المخيف!

الخبية اللي جاية صاحبتها بتقول بالصدفة كنت قاعدة مع بنات صحباتي في الجامعة وبعدين دخلت علينا بنت زميلتنا وقعدت تكلمنا عن القرين والجن.. في البداية كنت واخده الموضوع بهزار بس كلامها شدني جدا وتحديداً كلامها عن القرين وازاي نقدر نشوفه..

تاني يوم من فضولي واني عاوزة أعرف الكلام ده صح أو لا، أو بمعنى أصح كنت عاوزه أشوف قريني شكله إيه قلت أجرب..

قبل ما أنام وقفت قدام المرايا في أوضتي وقربت منها أووي وفضلت مركزه في عيني 10 دقائق زي ما كنت قولت. مفيش حاجة حصلت. قولت ممكن أكون عملت حاجة غلط، وبصيت في حتة تانية بس عيني اللي في المرايا فضلت بصالي..

من الخضة جريت على أوضة أمي، وفي ثانية كنت عندها وقعدت جنبها على السرير..

أمي قالتلي شوفتي ايه في المرايا؟

اتصدمت من سؤالها، معرفش هي عرفت منين أو إيه اللي خلاها تقولي كدا

قولتلها مشوفتش حاجة. وقمت رجعت أوضتي.. مشيت من قدام المرايا وأنا موطية.

ندهت على أخويا يجيب حاجة من عند ماما يغطي المرايا لأني كنت خايفة منها..

وبالفعل غطينا المرايا.. ونمت عادي.. وتاني يوم كنت مقرره اني لازم أكمل وأشوف ايه اللي هيحصل تاني.

المرة دي استنيت لغاية لما كل اخواتي ناموا وجبت كرسي وحطيته على مسافة متر من المرايا وقعدت عليه قدام المرايا وفضلت مركزه جامد..

فجأة الكرسي وأنا قاعده عليه اتشد للمرايا لغاية لما لزقت فيها..

كل اللي حوليا كان مزغلل.. ملامح وشي في المرايا بدأت تتغير، مش تغير كبير ولا حاجة..

عيني كانت حادة معرفش دي عيني ولا عين القرين، كان شكلها مرعب، ووشي كان عريض عن وشي الحقيقي..

قمت من على الكرسي مش فاكرة قومت ازاي أو ايه اللي حصل حتى بعدها لما حاولت افتكر الحتة دي مش فاكراها خالص كأنها اتمحت من دماغي..

بعد الموقف ده بدأت أشوف خيالات كتير.. تقريبا أنا حضرت شيء مش عارفة أصرفه..

أنا بقيت خايفة جدا.. يا ريت حد يقولي على طريقة اصرف بيها الشيء اللي بيظهر في المرايا.